बालिका हत्या घटनाका मूख्य आरोपित गिरफ्तार

  ०७६ जेठ १९ गते

हिलिहाङ गाउँपालिका–४ की १५ वर्षीया शितल योङहाङको हत्या घटनाका मुख्या आरोपित फाल्गुनन्द गाउँपालिका–२ का १९ वर्षीय पदम तामाङलाई प्रहरीले जेठ १९ गते गिरफ्तार गरेको छ ।

मूख्य आरोपितलाई खोजी गर्ने क्रममा घटना भएको तीन हप्तापछि झापाको दमक बजारबाट गिरफ्तार गरिएको र जिल्ला प्रहरी कार्यालय ल्याउने तयारी भइरहेको सो कार्यालयका डिएसपी नरेन्द्र कुँवरले बताए ।

घाँटी रेटी हत्या गरिएको अवस्थामा शितलको शव वैशाख ३० गते घर नजिकै फेला परेको थियो । शवको पोष्टमार्टम वैशाख ३० गते जिल्ला अस्पतालमा गरिएको थियो ।

घटनामा सहयोग गरेको भन्दै फाल्गुनन्द गाउँपालिका–२ का १८ वर्षीय भगिरथ बास्तोलालाई प्रहरीले वैशाख ३० गते गिरफ्तार गरेको थियो ।

यसैगरी, मतियारका आरोप लागेका सोही ठाउँका २२ वर्षीय कर्ण तामाङलाई समेत प्रहरीले जेठ ५ गते गिरफ्तार गरेको थियो । घटनाको कारण भने अहिलेसम्म पत्ता लागेको छैन ।


मङ्गल बेघा