बाढीले बगाएर गर्भवतीसहित ६ जनाको मृत्यु

  ०७४ साउन २९ गते

बाढीले बाटो कटान गरेको स्थानमा एम्बुलेन्स दुर्घटना हुँदा गर्भवतीसहित एकै परिवारका ६ जनाको मृत्यु भएको छ । परोहा गाउँपालिका-३ का चन्दन यादवको श्रीमती २८ वर्षीया शर्मिला यादवलाई प्रसुती व्यथा लागेपछि राजपुर फरहदवा स्थित स्वास्थ्य संस्थामा लैजाँदै गर्दा राजपुर गाउँपालिका-३ स्थित बाढीले कटान गरेको सडकको खाल्डोमा जीप खसेर ६ जनाको घटनास्थलमै ज्यान गएको स्थानीय सेख वकिलले जानकारी दिएका छन । परोहा गाउँपालिका-३ की २८ वर्षीया शर्मिला यादव, सुमित्रादेवी, ५ वर्षीया छोटुकुमारी, सरोज यादब र ललिता देवी रहेको जिल्ला प्रहरी कार्यालय, रौतहटले जनाएको छ । भारतीय नम्बर प्लेटको एम्बुलेन्समा रहेका अन्य दुईजना पौडेर बाँच्न सफल भएको र एम्बुलेन्सका चालक फरार रहेका छन् । चार दिनदेखि परेको अविरल वर्षाले इलाका प्रहरी कार्यालय, राजपुर फरहदवा नजिक एक सय मिटर बम नहर कटान गरेको थियो र सोही कटान गरेको खाल्डोमा जीप दुर्घटना भएको जनाइएको छ ।

बाढी पीडित क्षेत्रमा खाद्यान्न, पानी र औषधीको

यसैगरी बाढीग्रस्त क्षेत्रमा खाद्यान्न, पानी, औषधी लगायतका अत्यावश्यक सामानको अभाव भएको छ । जिल्ला सदरमुकाम गौरमा ५ देखि ७ फिटसम्म पानी जमेका कारण त्यँहाका बासिन्दालाई खानेपानी तथा खाद्यान्नको समस्या परेको छ । जमिनमा भएको खानेपानीको धारा पानीले डुबाएको कारण खानेपानी उपलब्ध हुन सकेको छैन भने घरमा रहेका खाद्यान्न पानीले नष्ट गरिदिँदा खाद्यान्नको समस्या भएको स्थानीय भवनाथ झाले बताए ।

जिल्ला अस्पतालका बिरामीको अवस्था दयनीय 

जिल्ला सदरमुकाम गौर स्थित जिल्ला अस्पताल भित्रसमेत पानी पसेका कारण त्यँहा रहेका बिरामी समस्यामा परेका छन् । अस्पतालको भुईतलामा रहेका बिरामीलाई कहाँ लगेर राख्ने भन्ने समस्या भएको अस्पताल प्रशासनले जनाएको छ ।

जिल्लास्थित सबै शिक्षण संस्था बन्द 

बाढीका कारण जिल्लाका सबैजसो विद्यालयहरू डुवानमा परेका कारण जिल्लाका सबै शिक्षण संस्था बन्द भएका छन । बाढीको प्रभाव नपरेको चन्द्रनिगाहपुर वरपरका विद्यालयहरू समेत बन्द गरिएको छ ।


बिपिन गौतम