वाइसीएल कार्यकर्ता हत्या आरोपित गिरफ्तार

  ०७५ कात्तिक ११ गते

नेपाल राजविराज नपा–१ का वाइसिएल सहसंयोजक राजविराज नपा–१ का २१ वर्षीय प्रेमकुमार यादवको हत्या आरोपमा सप्तरी प्रहरीले राजविराज नपा–११ का २२ वर्षीय मिथलेशकुमार यादव र २० वर्षीय सरोजकुमार यादवलाई गिरफ्तार गरी कात्तिक ९ गते कर्तव्य ज्यानको उजुरी दर्ता गरेको छ ।

मृतकका बुवा भन्नालाल यादवको उजुरीका आधारमा आरोपितमध्ये दुई युवालाई गिरफ्तार गरी कारवाही चलाइएको र अन्य १० आरोपितहरुको खोजतलाश भइरहेको एसपी राजेन्द्र विष्टले बताए । राजविराज नपा–२ स्थित पिस जोन बोर्डिङ्ग स्कुल अगाडि बाटोमा असोज २३ गते विहान नौ बजे यादवलाई घेरा हाली आरोपितहरुले धारिलो हतियारले प्रहार गरी हत्या गरेको पीडितका बुवा भन्नालाल यादवले बताए ।

असोज २३ गते विहान नौ बजे राजविराज नपा–११ का जयप्रकाश यादव, आनन्दकुमार यादव, नागेश्वर यादव, राजाराम यादव, ओमप्रकाश यादव, संजय यादव, धर्मेन्द्र यादव, गुन्जेश सिंह, मिथलेश यादव र सरोज यादवलगायतकाले गरेको आक्रमणबाट असोज २४ गते राति प्रेमको मृत्यु भएको भन्दै स्थानीयवासीले असोज २५ गते र कात्तिक ४ गते राजविराजमा प्रदर्शन गर्दै नाराबाजी गरेका थिए ।

उपचारका क्रममा बिराटनगरस्थित न्युरो अस्पतालमा प्रेमको मृत्यु भएपछि लाशको कोशी अञ्चल अस्पताल विराटनगरमा असोज २५ गते पोष्टमार्टम भयो ।

पुरानो रिसइवीका कारण भएको झडपमा यादवको हत्या भएको भन्दै एसपी विष्टले अन्य आरोपितहरुलाई समेत चाँडै गिरफ्तार गरिने बताए ।


मनोहरकुमार पोखरेल