बहुविवाह घटनाबाट पीडित महिला न्याय खोज्दै सदरमुकाममा

  ०७३ भदौ २९ गते

कुडारी गाविस-६ राउतवाडाकी ३२ वर्षीया कमला योगी पतिले दोस्रो विवाह गरेको भन्दै न्यायको खोजीमा भदौ २९ गते सदरमुकाम आएकी छन् ।

उनका ३५ वर्षीय पति लालुनाथ योगीले भदौ २ गते चन्दननाथ नपा-७ की २० वर्षीया आशा महतसँग बहुविवाह गरेको पीडितले आरोप लगाएकी छन् । पतिले दोस्रो विवाह गरेपछि कान्छी पत्नीसहित सदरमुकाममा बस्दै आएको पनि पीडित महिलाले बताएकी छन् ।

न्याय खोज्दै सदरमुकाम आएकी पीडितलाई इन्सेक जिल्ला प्रतिनिधि मानदत्त रावलले कानुनी सहयोगका लागि अल्पकालीन महिला सेवा केन्द्रमा पुर्‍याई पीडितलाई आवश्यक सहयोग गरिदिन अनुरोध गरेको इन्सेक मध्यपश्चिमाञ्चलले जनाएको छ ।

पतिले दोस्रो विवाह गरेपछि तीन जना छोरीसहित आफूलाई पालनपोषण, स्वास्थ्य उपचार र शिक्षामा वास्ता नगरेपछि न्यायका लागि सदरमुकाम आउनु परेको कमलाले बताइन् । उनले भनिन्-'आधा सम्पत्ति र छोरीसहित आफूले पाउनुपर्ने आफ्नो नाममा नामसारी गरिदिए मुद्दा नगर्ने र त्यसो नगरे अंश पाउने गरी बहुविवाहको मुद्दा दर्ता गर्ने बताइन् ।

पीडितको विषयमा भदौ ३० गते महिला तथा बालबालिका सेवा केन्द्र, जुम्लामा दुइ पक्षबीच छलफल गर्ने र त्यसपछि बहुविवाहको जाहेरी दर्ता गर्ने अल्पकालीन महिला सेवा केन्द्र जुम्लाकी अध्यक्ष भगवती श्रेष्ठले बताइन ।


मानदत्त रावल