बहुविवाह गरेको ठहरमा एक वर्षकैदको फैसला

  ०७३ भदौ १७ गते

बरही विरपुर गाविस-८ की २४ वर्षीया पुनमकुमारी रायका पति २६ वर्षीय राजकुमार रायलाई जिल्ला अदालतले भदौ १७ गते बहुविवाहको आरोपमा एक वर्षकैद र ५ हजार रुपियाँ जरिबानाको फैसला गरेको छ ।

न्यायाधीश महेन्द्रप्रसाद पोखरेलको इजलासले उक्त फैसला गरेको तथा अर्का आरोपित रायकी कान्छी पत्नी सुनसरीकी २४ वर्षीया सुबीकुमारी रायलाई सफाई दिने फैसला गरेको अदालतले जानकारी दिएको छ ।

आरोपितले दोस्रो विवाह गरी ०७२ फागुन ५ गते कान्छी पत्नीलाई घर भित्र्याएपछि पीडित ब्रहृमपुर गाविस-८ स्थित माइत विस्थापित भएकी थिइन् । पीडितले आरोपित पति र उनकी कान्छी पत्नीविरुद्ध इलाका प्रहरी कार्यालय कल्याणपुरमा ०७२ चैत २ गते उजुरी दिएकी थिइन् ।

पीडितको उजुरीका आधारमा उनका पति राजकुमारलाई इलाका प्रहरी कार्यालय पातोले ०७२ चैत ३ गते गिरफ्तार गरी ०७२ चैत ४ गते मुद्दा दर्ता गरेको थियो ।

सामाजिक परम्पराअनुसार ०६६ फागुन ७ गते विवाहित पीडिततर्फ एक छोरा र एक छोरी छन् । न्यायाधीश महेन्द्रप्रसाद पोखरेलको इजलासले आरोपितलाई ०७२ चैत २५ गते पूर्पक्षका लागि राजविराज कारागामा थुनामा पठाएको थियो ।


मनोहरकुमार पोखरेल