बलात्कार प्रयास गरेको कसुरमा एक वर्षतीन महिना कैदको फैसला

  ०७३ साउन ३२ गते

एक १८ वर्षीया युवतीलाई बलात्कार प्रयास गरेको ठहर गर्दै जिल्ला अदालतले १४ वर्षीय बालकलाई साउन ३१ गते हालका लागि सजाय स्थगित रहने गरी १ वर्ष ३ महिना कैद सजायको फैसला गरेको छ ।

न्यायाधीश महेन्द्रबहादुर कार्कीको इजालासले कसुरदार नाबालक भएकाले हालका लागि कैद सजाय स्थगित गर्ने गरी फैसला सुनाएको हो ।

फैसलासँगै बालकले आगामी दिनमा पुनः अपराध गरेको प्रमाणित भए साउन ३१ गतेको फैसलासमेत जोडी थप सजाय तोकिने अदालतका श्रेस्तेदार रितबहादुर मगरले जानकारी दिए । तर, बालक पुनः अपराधका घटनामा कसुरदार नभए फैसला अनुसारको सजाय भुक्तान गर्नु नपर्नेसमेत मगरले जानकारी दिए ।

बालकले ०७२ चैत १६ गते पीडित युवतीमाथि बलात्कारको प्रयास गरेको भन्दै पीडित पक्षले उजुरी गरेपछि चैत २२ गते प्रहरीले गिरफ्तार गरेको थियो ।

प्रहरी निगरानीमा रहेका बालकलाई अदालतले ०७३ वैशाख १७ गते अभिभावकको जिम्मामा रहने गरी छाडिदिएको थियो । पीडित युवतीको स्वास्थ्य परीक्षण ०७२ चैत २२ गते जिल्ला अस्पतालमा गरिएको थियो ।


भरत खड्का