बलात्कार घटनाका पीडितलाई मानव अधिकार सहायता कक्षको सहयोग

  ०७७ माघ १६ गते

बलात्कार घटनाका पीडितलाई मानव अधिकार सहायता कक्षले माघ १६ गते सहयोग रकम वाफत १० हजार रुपियाँ हस्तान्तरण गरेको छ ।

डिसिएको सहयोगमा इन्सेक नेपालगञ्जमा  सचिवालय रहेको मानव अधिकार सहायता कक्षको माघ १५ गते बसेको बैठकले बलात्कार पीडित १४ वर्षीया बालिकाको उपचार सहयोग गर्ने निर्णय गरेको  थियो । मानव अधिकार सहायता कक्षका सदस्य एवं गैसस महासंघ जिल्ला शाखा अध्यक्ष नमस्कार शाहले पीडितका बुवालाई उक्त रकम हस्तान्तरण गर्नु भएको हो ।

बौद्धिक अपाङ्गता भएकी बालिकालाई  अपरिचित व्यक्तिले बलात्कार गरेको भन्दै पीडितका  बुवाले कानुनी तथा स्वास्थ्य उपचारमा आवश्यक सहयोग गरिदिन भन्दै इन्सेक लुम्बिनी प्रदेश कार्यालय, नेपालगञ्जमा पुस २३ गते निवेदन दिनु भएको थियो ।

बालिका बिरामी भएपछि पुस १८ गते शिक्षण अस्पताल, कोहलपुरमा उपचारको क्रममा आठ हप्ताको गर्भ रहेको चिकित्सकले बताएपछि बलात्कृत भएको जानकारी पाएको पीडितका बुवाले बताउनु भयो ।

इन्सेकको  सिफारिसमा पीडितको पुस २३ गते  भेरी अस्पताल नेपालगञ्जमा  उपचार गरिएको थियो । भने इन्सेककै सहयोगमा पीडितपक्षले इलाका प्रहरी कार्यालयमा पुस २२ गते उजुरी दर्ता गराउनु भएको थियो ।

आरोपितलाई पीडितले नचिनेका कारण आरोपित काे हो ? भन्ने कुरा नखुलेको इलाका प्रहरी कार्यालयका सई रणधिर जैसीले बताउनु भयो ।

पीडित बालिकाको स्वास्थ्य अवस्था कमजोर रहेकोले थप उपचारको लागि सहयोग रकम प्रदान गरेको इन्सेक लुम्बिनी प्रदेश प्रमुख भोला महतले बताउनु भयो ।

सहयोग रकम बुझ्दै पीडितका बुवाले प्राप्त रकमले छोरीको थप उपचारमा  सहयोग पुग्ने  बताउनु भयो ।


स्मृति देवकोटा