बलात्कार घटना मिलाएको आरोपमा ६ जना गिरफ्तार

  ०७७ मङ्सिर १५ गते

१८ वर्षीया महलिालाई बलात्कार गरेको घटना गाउँमै मिलाएको आरोपमा प्रहरीले ६ जनालाई मङ्सिर १३ गते गिरफ्तार गरेको छ ।

सिगास गाउँपालिकाका–३ का वडा अध्यक्ष ४८ वर्षीय शेरसिंह साउद, सोही ठाउँका ३६ वर्षीय राजेन्द्र धामी, २९ वर्षीय नरेन्द्र धामी र ३१ वर्षीय गोपाल धामीलाई गिरफ्तार गरिएको जिल्ला प्रहरी कार्यालयका डिएसपी नारायणप्रसाद अधिकारीले बताउनुभयो ।

यसअघि मङ्सिर १२ गते सोही घटनामा संलग्न भएको आरोपमा प्रहरीले सोही ठाउँकै ४० वर्षीय मनोज सिंह धामी र ४० वर्षीय अमर धामीलाई गिरफ्तार गरेको थियो ।

गिरफ्तार गरिएकाहरुलाई अदालतबाट म्याद थप गरेर अनुसन्धान गरिरहेको डिएसपी अधिकारीले बताउनुभयो ।

बलात्कारको घटनाका मुख्य आरोपित २२ वर्षीय दिपकसिंह धामी भने ‘फरार’ रहेको प्रहरीले जनाएको छ ।

पीडित महिलालाई गत जेठमा बलात्कार गरेको घटना हालै सार्वजनिक भएको थियो । असार १४ गते ‘एक तोला सुन’ दिने भन्दै तमसुक बनाएर गाउँमै मिलापत्र गरिएको थियो ।


नरी बडु