बलात्कार घटना पीडितलाई इन्सेकको पहलमा सुरक्षा घरमा व्यवस्थापन

  ०७७ असार १६ गते

पर्वतको जलजला गाउँपालिका–७ धाइरिङ बस्ने २२ वर्षीया बलात्कार घटना पीडित युवतीलाई इन्सेकको सहयोगमा सुरक्षित घरमा व्यवस्थापन गरिएको छ । मजदुरी काम गर्दा गर्दै बलात्कार घटना पीडितलाई पर्वतका इन्सेक प्रतिनिधि सन्तोष थापाको सहयोगमा सुरक्षित घरमा व्यवस्थापन गरिएको हो ।

पीडितलाई २७ वर्षीय रविन जिसीले जेठ १५ गते बलात्कार गरेको आरोपमा जिल्ला प्रहरी कार्यालय पर्वतमा आरोपितविरुद्ध असार ५ गते उजुरी दिएकी थिइन् । अस्थायी रुपमा पर्वतमा काम गर्ने पीडित उजुरीपछि संरक्षकत्वविहिन बनेकोले सुरक्षित घरमा राखिएको हो । जिल्ला प्रहरी कार्यालय पर्वतले इन्सेक प्रतिनिधिलाई सहयोग गरिदिन आग्रह गरेपछि पीडितलाई पोखरा स्थित कोपिला नेपालद्वारा सञ्चालित सुरक्षित घरमा व्यवस्थापन गरिएको इन्सेक प्रतिनिधि थापाले जानकारी दिनुभयो ।

पीडितलाई असार ८ गते  सुरक्षित घरमा राख्नका लागि पठाइएपनि कोरोना परीक्षणको रिपोर्ट आउने अवधि सम्मका लागि सोडेक नेपालको सहयोगमा गुडनेवर्स इण्टरनेशनल नेपालले पुलिङ क्वारेण्टाइनको व्यवस्था गरेको थियो । हाल परीक्षण रिपोर्ट नेगेटिभ आएपछि पीडितलाई सुरक्षित घरमा पठाइएको हो ।

आरोपितलाई गिरफ्तार गरेपछि उनीविरुद्ध जबजस्ती करणी र्शीर्षकमा मुद्दा दर्ता गरी अनुसन्धानका लागि पर्वत जिल्ला अदालतबाट १० दिनको म्याद थप गरिएको इन्स्पेक्टर बुद्धिप्रसाद सुवेदीले जानकारी दिनुभयो ।


सन्तोष थापा