बलात्कार घटनाका आरोपितविरूद्ध उजुरी दर्ता

  ०७७ चैत २३ गते

२७ वर्षीया महिलालाई ०७७ फागुन २१ गते बलात्कार गर्ने ४९ वर्षीय ससुराविरूद्ध पीडित पक्षले जिल्ला प्रहरी कार्यालयमा चैत २२ गते उजुरी दर्ता गरेको छ ।

फरार आरोपितको खोजी र घटनाको अनुसन्धान थालिएको जिल्ला प्रहरी कार्यालय दैलेखका इन्स्पेक्टर इन्द्रजीत सुनारले बताउनुभयो ।

दुई वर्ष पहिले बलात्कार गरेको समयमा पतिलाई जानकारी गराउँदा पतिले आरोपितलाई कुटपिट गरेको  पीडितले इन्सेक प्रतिनिधिसँग बताउनुभयो । ‘यस पटक सासुलाई जानकारी गराएँ तर टोल छिमेकले थाहा पाउने गरी हल्ला गरेर घरको इज्जत गयो भनेर पति र ससुराले फागुन २१ गते राति नाङ्गै घर निकाला गरे’ पीडित महिलाले भन्नुभयो ।

पीडित हाल एक वर्षको छोरी सहित कैलालीको टीकापुर नगरपालिका–१ एकता नगरस्थित माइतीघरमा शरण लिएर बसेकी छिन् ।

पीडित महिलाको स्वास्थ्य परीक्षण चैत २२ गते दैलेख अस्पतालमा भएको डाक्टर जिना सापकोटाले बताउनुभयो ।


अमर सुनार