समाचारहरू

१७ वर्षीया बालिकालाई सामूहिक बलात्कार गरेको आरोपमा प्रहरीले भदौ ११ गते र भदौ १२ गते तीन जना आरोपितलाई गिरफ्तार गरेको छ । थप एक जना आरोपित फरार रहेको प्रहरीले जनाएको छ ।

धादिङ जिल्ला गजुरी गाउँपालिका-१ का २३ वर्षीय रविन श्रेष्ठ, सिन्धुपाल्चोक जिल्ला पाचँपोखरी गाउँपालिका-५ का २२ वर्षीय नुगेश वाईवालाई भदौ ११ गते र काठमाडौँ जिल्ला चन्द्रागिरी नगरपालिका-१ दहचोकका ३५ वर्षीय अजय कार्कीलाई भदौ १२ गते गिरफ्तार गरिएको प्रहरीले जनाएको छ ।

पीडित बालिकालाई भदौ ६ गते चन्द्रागिरीमा नुगेश वाईवा र अजय कार्कीले र दोस्रो पटक भदौ १० गते कलङ्कीमा रविन श्रेष्ठ र मदन थापा मगरले बलात्कार गरेको भन्दै पीडितका आफन्तले भदौ ११ गते महानगरीय प्रहरी वृत्त कालिमाटीमा उजुरी दिएका थिए ।

आरोपित मध्येका एक काठमाडौँ महानगरपालिका-१४ रविभवनमा बस्दै आएका २७ वर्षीय मलन थापा मगरको भने खोजी भइरहेको महानगरीय प्रहरी वृत्त कालिमाटीका डिएसपी रुगमबहादुर कुँवरले जानकारी दिए ।

पीडित बालिकाको स्वास्थ्य परीक्षण भदौ ११ गते नै प्रसूति गृह थापाथलीमा गरिएको छ ।

विमला पौडेल