बलात्कार घटनाका आरोपित गिरफ्तार

  ०७७ असार २९ गते

२२ वर्षीया महिलालई असार २७ गते बलात्कार गरेको आरोपमा प्रहरीले गोदावरी नगरपालिका–५ का २२ वर्षीय दिनेश बोहरालाई असार २८ गते गिरफ्तार गरेको छ ।

पीडित महिलाले दिएको उजुरीको आधारमा असार २८ गते अरोपितलाई गिरफ्तार गरी अनुसन्धान भइरहेको जिल्ला प्रहरी कार्यालय, कैलालीका सई मोहनबहादुर सिंहले इन्सेक प्रतिनिधिसँगको भेटमा बताउनु भयो ।

सई सिंहले दिएको जानकारी अनुसार आरोपितले असार २७ गते राति  घरमा एक्लै सुतेको मौका छोपी बलात्कार गरेको पीडित महिलाले दिएको उजुरीमा उल्लेख छ ।

पीडित महिलाको स्वास्थ्य परीक्षण असार २८ गते  सेती प्रादेशिक अस्पताल, धनगढीमा गरिएको प्रहरीले जनाएको छ ।

यसैगरी १४ वर्षीया बालिकालाई यौन दुर्व्यवहार गरेको आरोपमा प्रहरीले कैलारी गाउँपालिका–४ केगाउँ मुडाटोलका २२ वर्षीय पुरन चौधरीलाई असार २६ गते गिरफ्तार गरेको छ ।

असार २४ गते राती घर भित्र सुतिरहेकी बालिकालाई आरोपितले बलात्कारको प्रयास गर्दा बालिका कराएपछि बलात्कार हुनबाट जोगाउन सकिएको पीडित बालिकाका बुबाले इन्सेक प्रतिनिधिलाई फोनसम्पर्कबाट बताउनु भयो ।

पीडित परिवारले असार २६ गते दिएको उजुरीका आधारमा इलाका प्रहरी कार्यालय, हसुलियाको टोलीले आरोपितलाई गिरफ्तार गरी अनुसन्धानका लागि जिल्ला प्रहरी कार्यालयमा पठाएपछि थप अनुसन्धान सुरु गरिएको जिल्ला प्रहरी कार्यालय, कैलालीका सई मोहनबहादुर सिंहले इन्सेक प्रतिनिधिसँगको भेटमा बताउनु भयो ।

पीडित  बालिकाको स्वास्थ्य परीक्षण असार २५ गते सेती प्रादेशिक अस्पताल, धनगढीमा गरिएको थियो ।


मैनामोती चौधरी