बलात्कार घटनाका आरोपित गिरफ्तार

  ०७७ असार २६ गते

बर्दिया जिल्ला प्रतिनिधि मानबहादुर चौधरीका अनुसार आठ वर्षीया बालिकालाई बलात्कार गरेको आरोपमा प्रहरीले  १४ वर्षीय बालकलाई असार २५ गते गिरफ्तार गरेको छ ।

पीडितलाई आरोपितले असार ५ गते बलात्कार गरेको भन्दै पीडितपक्षले असार २५ गते इलाका प्रहरी कार्यालय, मैनापोखरमा दिएको उजुरीका आधारमा गिरफ्तार गरिएको इन्स्पेक्टर हिमबहादुर खत्रीले बताउनु भयो । जिल्ला प्रतिनिधिसँगको भेटमा इन्स्पेक्टर खत्रीले बालकलाई छुट्टै राख्ने कक्ष नभएकोले अदालतको आदेश अनुसार अभिभावक वा बाल सुधार केन्द्रमा पठाइने बताउनु भयो ।

पीडितको  स्वास्थ्य परीक्षण असार २५ जिल्ला अस्पताल, गुलरियामा गरिएको छ ।

दाङ जिल्ला प्रतिनिध जयनारायण पुनका अनुसार ३५ वर्षीया महिलालाई बलात्कार गरेको आरोपमा प्रहरीले घोराही उपमनपा–११ का ३३ वर्षीय ताराबहादुर बस्नेतलाई असार २५ गते  गिरफ्तार गरेको छ ।

पीडितलाई आरोपितले असार २२ गते बलात्कार गरेको भन्दै पीडित पक्षले असार २५ गते जिल्ला प्रहरी कार्यालयमा दिएको उजुरीका आधारमा  गिरफ्तार गरी अनुसन्धान थालेको डिएसपी सुमित खड्काले विज्ञप्ती मार्फत जनायो ।

घटना  गाउँघरमै मिलाउने प्रयास भएको र चित्त नबुझेको भन्दै प्रहरीमा उजुरी दिएको पीडित पक्षले  इन्सेक प्रतिनिधिलाई फोन मार्फत बताएका थिए ।

पीडितको स्वास्थ्य परीक्षण असार २५ गते राप्ती स्वास्थ्य विज्ञान प्रतिष्ठानमा गरिएको छ ।

गुल्मी जिल्ला प्रतिनिधि टोपलाल अर्यालका अनुसार १४ वर्षीया बालिकालाई बलात्कार गरेको आरोपमा प्रहरीले सत्यवति गाउँपालिका– ५ का ५५ वर्षीय टोपनारायण ढकाललाई असार २३ गते गिरफ्तार गरेको छ ।

पीडितलाई आरोपितले असार २० गते घरमै बलात्कार गरेको भन्दै पीडित पक्षले असार २३ गते इन्सेक जिल्ला प्रतिनिधिलाई फोन मार्फत जानकारी गराएपछि इन्सेकको समन्वयमा असार २४ गते जिल्ला प्रहरी कार्यालयमा उजुरी दर्ता भएको थियो ।

पीडितको स्वास्थ्य परीक्षण असार २३ गते जिल्ला अस्पताल, तम्घासमा गरिएको छ ।

यसैगरी १३ वर्षीया बालिकालाई बलात्कार गरेको आरोपमा  पीडित पक्षले सत्यवति गाउँपालिका–४ का २७ वर्षीय भीमजङ्ग विक विरूद्ध जिल्ला प्रहरी कार्यालयमा असार २३ गते उजुरी दर्ता गरेका छन् ।

पीडितलाई आरोपितले असार २१ गते घरमै बलात्कार गरेको जिल्ला प्रहरी कार्यालयका इन्स्पेक्टर राजकुमार रावलले इन्सेक प्रतिनिधिसँगको कुराकानीमा बताउनु भयो । पीडितपक्षले दिएको उजुरीका आधारमा आरोपितलाई असार २२ गते गिरफ्तार गरि थप अनुसन्धान भइरहेको इन्स्पेक्टर रावलले बताउनु भयो ।

पीडितको स्वास्थ्य परीक्षण असार २२ गते जिल्ला अस्पताल तम्घासमा गरिएको छ ।


इन्सेक प्रदेश ५ कार्यालय, नेपालगञ्ज