बलात्कार घटनाका आरोपित गिरफ्तार

  ०७७ असार १२ गते

१४ वर्षीया बालिकालाई बलात्कार गरेको आरोपमा सङ्खुवासभा जिल्ला, मकालु गाउँपालिका–२ घर भइ ललितपुर महानगरपालिका–२९, हरिसिद्धि डेरा गरी बस्ने ५० वर्षीय शम्भु राईलाई ०७७ असार १० गते प्रहरीले गिरफ्तार गरेको छ ।

आरोपितले असार ४ गते पीडित बालिकालाई आफ्नै कोठामा बोलाई डरत्रास देखाइ बलात्कार गरेको पीडितकी आमाले बताउनु भयो ।

आरोपित बिरुद्ध असार १० गते महानगरीय प्रहरी वृत्त, सातदोबाटोमा पीडितको परिवारले उजुरी दिएको थियो । पीडित पक्षको उजुरीका आधारमा सोही दिन आरोपितलाई उनकै कोठाबाट गिरफ्तार गरी जिल्ला अदालतबाट अनुसन्धानका लागि पाँच दिनको म्याद थप गरिएको महानगरीय प्रहरी वृत्त सातदोबाटोका डिएसपी मित्रबन्धु शर्माले बताउनु भयो ।

पीडित बालिकाको स्वास्थ्य परीक्षण असार १० गते नै पाटन अस्पताल ललितपुरमा गरिएको अस्पतालका निर्देशक डा. विष्णुप्रसाद शर्माले जानकारी दिनु भयो ।


दीपकप्रसाद घिमिरे