बलात्कार घटनाका आरोपित गिरफ्तार

  ०७६ माघ ४ गते

२१ वर्षीया किशोरीलाई पुस २९ गते सामूहिक बलात्कार गरेको आरोपमा प्रहरीले जितपुर सिमरा उपमहानगरपालिका–२० का १८ वर्षीय नैमुदिन अंसारी, २५ वर्षीय शेष जमिन आलम र १९ वर्षीय शेष समी अख्तरलाई माघ १ गते गिरफ्तार गरेको छ ।
पीडित परिवारले माघ १ गते ईलाका प्रहरी कार्यालय सिमरामा दिएको उजुरी माघ २ गते दर्ता गरी जिल्ला अदालतबाट पाँच दिनको म्याद थपका लागि अनुमति लिएर घटनाको थप अनुसन्धान भइरहेको जिल्ला प्रहरी कार्यालयका डिएसपी गोबिन्द पुरीले बताउनु भयो ।
मुख र खुट्टा कपडाले बाँधी आरोपित तीन जनाले एक किलोमिटर टाढा उखुबारीमा लगी सामूहिक बलात्कार गरेको पीडितको आरोप छ ।
यस घटनामा माघ १ गते गाउँमा बसेको पंचायतले आरोपित उनीहरुलाई १ लाख ५० हजार रुपियाँका दरले जरिवाना, टाउको मुण्डन गर्ने, अनुहारमा मोविल तथा कालो मुसो दल्ने, चप्पल र जुताको माला लगाएर गाउँ घुमाउने निर्णय गरेको थियो  ।
माघ १ गते विहान १० बजे सो निर्णय अनुसार गाउँ घुमाउने क्रममा इनर्वा प्रहरी चौकी, फत्तेपुर प्रहरी चौकी र जितपुर प्रहरी चौकीबाट खटिएका प्रहरी टोलीले बलात्कार घटनाका आरोपितहरुलाई गिरफ्तार गरेको हो ।
पीडित र आरोपितहरुको नारायणी उपक्षेत्रीय अस्पताल वीरगंजमा माघ १ गते स्वास्थ्य परीक्षण गरीएको प्रहरीले जनाएको छ ।
पीडित परिवारको आर्थिक अवस्था कमजोर भएकाले किशोरीको उपचार खर्चमा समस्या भएको र मिलापत्र गर्न सामाजिक दवाव आइरहेको पीडित किशोरीका घर परिवारका सदस्यतले जानकारी दिनु भयो ।


भोलानाथ पौडेल