बलात्कार घटनाका आरोपितविरूद्ध प्रहरीमा उजुरी

  ०७७ असोज ३ गते

१६ वर्षीया बालिकालाई बलात्कार गरेको आरोपमा तिलागुफा नपा–११ ढिम्नीया निवासी नेपाली सेनामा कार्यरत सिपाही २२  वर्षीय वीरेन्द्र शाहीविरूद्ध पीडितले असोज २ गते जिल्ला प्रहरी कार्यालय, कालिकोटमा उजुरी दिएकी छन् ।

पीडित बालिकालाई कालिकोटस्थित रणसुर गुल्ममा कार्यारत आरोपित शाहीले भदौ १३ गते बलात्कार गरेको र प्रहरीमा उजुरी नगर्न धम्क्याएको भन्दै सहयोगका लागि पीडित बालिकाले इन्सेकमा पनि निवेदन दिएकी छन् ।

पीडित बालिकाले अवश्यक कानुनी प्रक्रिया तथा आर्थिक सहायतका लागि मानव अधिकार सहायता कक्षको सचिवालय इन्सेकमा निवेदन दिएकी हुन् ।

पीडित बालिकाले आरेपितविरूद्ध बलात्कारको शीर्षकमा उजुरी  दिएको र नेपाली सेना रणसुर गल्मलाई पत्र लेखी पठाइएको हुनाले प्रक्रियामा ढिलाइ भएकाले समयमा उजुरी दर्ता हुन नसकेको जिल्ला प्रहरी कार्यालयका डिएसपी चक्रबहादुर शाहले बताउनु भयो ।

पीडित बालिकाको स्वास्थ्य परीक्षण असोज २ गते गरिएको जिल्ला स्वास्थ्य व्यवस्थापन कार्यालयका निमित्त प्रमुख भिष्म पाख्रेलले बताउनु भयो ।


कालीबहादुर मल्ल