बलात्कार घटनाका आरोपितविरुद्ध प्रहरीमा उजुरी

  ०७६ भदौ १३ गते

१३ वर्षीया बालिकालाई राजविराजमा अपरिचित दुई युवाले भदौ १२ गते राति बलात्कार गरेको आरोपमा इन्सेक सप्तरीको पहलमा पीडितकी आमाले भदौ १३ गते जिल्ला प्रहरी कार्यालय सप्तरीमा घटनाबारे उजुरी दिएकी छिन् ।

 

इन्सेक सप्तरी प्रतिनिधिको कार्यालयमा भदौ १३ गते बिहान पीडितसहित आएकी उनकी आमाले आरोपितहरूको खोजतलास गरी आवश्यक कानुनी कारबाहीका लागि इन्सेक प्रतिनिधिसमक्ष आग्रह गरेकी थिइन् ।

 

घर फर्किरहेकी बालिकालाई दुई युवाले नशालु पदार्थ मिसाइएको फ्रुटी खान दिएर बेहोस बनाई बलात्कार गरेको पीडितले बताएकी छिन् ।

 

पीडित बालिकाका अनुसार भदौ १२ गते राति ७ बजे पैदल घर फर्किरहेका बेला दुई युवाले दिएको फ्रुटी खाएर उनीहरूसँगै राजविराजको सहिद दशन चोक आएपछि बेहोस भएकी थिइन् ।

 

बालिका घर नफर्किएपछि राति १० बजे जिल्ला प्रहरी कार्यालयमा पीडितकी आमाले हुलिया जाहेरी दिएकी थिइन् ।

 

आरोपितहरूले राति १२ बजे घर नजिकै ल्याएर छाडेपछि अचेत अवस्थामा बालिकालाई घर अगाडि फेला पारेको उनकी आमाले बताइन् ।

 

विक्षिप्त अवस्थामा रहेकी पीडित बालिकालाई स्वास्थ्य परीक्षण, उपचार एवम् मनोविमर्शका लागि राजविराजस्थित गजेन्द्रनारायण सिंह अस्पतालमा भर्ना गरिएको छ । पीडितले आरोपितहरूको नाम, ठेगाना बताउन सकेकी छैनन् ।

 

आरोपितहरूको नाम, ठेगाना नखुलेपछि प्रहरीले पीडित बालिकाले बताएको हुलियाका आधारमा खोजी कार्य सुरू गरेको जिल्ला प्रहरी कार्यालय सप्तरीका एसपी मनोजकुमार यादवले बताए ।


मनोहरकुमार पोखरेल