बलात्कार गरेको कसुरमा ६ वर्ष कैद सजायको फैसला

  ०७७ पुस २६ गते

१६ वर्षीया बालिकालाई बलात्कार गरेको कसुरमा जिल्ला अदालतले १७ वर्षीय बालकलाई ६ वर्ष आठ महिना कैद सजायको फैसला सुनाएको छ ।

न्यायाधीश अमृतबहादुर बस्नेतको पुस २४ गतेको इजलासले कसुर गरेको ठहर गर्दै कैद सजायसँगै पीडितले पाउने गरी कसुरदारबाट २५ हजार रुपियाँ क्षतिपूर्ति भराउन आदेश भएको अदालतका श्रेस्तेदार मदनप्रसाद पराजुलीले इन्सेक प्रतिनिधिसँगको भेटमा बताउनु भयो ।

पीडित बालिकालाई आरोपितले ०७७ जेठ १९ गते बलात्कार गरेको आरोपमा पीडित पक्षले आरोपितविरूद्ध जेठ २० गते जिल्ला अदालतमा उजुरी दिएको थियो ।

पीडित पक्षको उजुरीका आधारमा आरोपितलाई प्रहरीले जेठ २० गते गिरफ्तार गरी कारबाही अघि बढाएको थियो ।

जिल्ला अदालतको ०७७ असार ४ गतेको आदेशमा आरोपित पुर्पक्षका लागि थुनामा थिए ।

पीडित बालिकाको स्वास्थ्य परीक्षण मेची अस्पतालमा जेठ २० गते गरिएको थियो ।


नरेश खाती