बलात्कार गरेको कसुरमा १८ वर्ष कैद सजायको फैसला

  ०७७ चैत १३ गते

१२ वर्षीया बालिकालाई बलात्कार गरेको कसुरमा जिल्ला अदालतले उदयपुरगढी गाउँपालिका–५ का २४ वर्षीय छविलाल श्रेष्ठलाई चैत १२ गते १८ वर्ष कैद सजायको फैसला गरेको छ ।

न्यायाधीश माधवप्रसाद सुवेदीको इजलासले कसुर गरेको ठहर गर्दै कैद सजायसँगै पीडितले पाउने गरी कसुरदारबाट ७५ हजार रुपियाँ क्षतिपूर्ति भराउन र पीडित राहत कोषमा २ हजार रुपियाँ जम्मा गर्न आदेश भएको अदालतका श्रेस्तेदार धनबहादुर कार्कीले इन्सेक प्रतिनिधिसँगको भेटमा बताउनु भयो ।

पीडित बालिकालाई आरोपितले ०७७ असार २४ गते बलात्कार गरेको आरोपमा पीडित पक्षले आरोपितविरूद्ध सोही दिन जिल्ला प्रहरी कार्यालयमा उजुरी दिएको थियो ।

आरोपितलाई प्रहरीले असार २४ गते गिरफ्तार गरी कानुनी कारबाही अघि बढाएको थियो ।

जिल्ला अदालतको साउन १८ गतेको आदेशमा आरोपित पुर्पक्षका लागि थुनामा थिए ।

पीडित बालिकाको स्वास्थ्य परीक्षण जिल्ला अस्पतालमा असार २४ गते गरिएको थियो ।


भरत खड्का