समाचारहरू

चार वर्षीया बालिका बलात्कार गरेको कसुरमा जिल्ला अदालतले मङ्सिर १६ गते १४ वर्षीय बालकलाई १२ वर्ष ६ महिना कैद सजायको फैसला सुनाएको छ ।

न्यायाधीश दीपक खनालको इजलासले कसुर गरेको ठहर गर्दै कैद सजायसँगै  पीडितलाई नेपाल सरकारले स्थापना गरेको पीडित राहत कोषबाट १० हजार रुपियाँ क्षतिपूर्ति उपलब्ध गराउने गरी फैसला भएको अदालतका सूचना अधिकारी राजकुमार आचार्यले इन्सेक प्रतिनिधिसँगको भेटमा बताउनु भयो ।

आदेश अनुसार बालक रहुञ्जेल बाल सुधारगृह विराटनगर र साबालक भएपछि कारागार पठाउने गरी फैसला भएको आचार्यले बताउनु भयो ।

११ वर्षीय बालकलाई भने नाबालक ठहर गर्दै बाँकी कैद स्थगन गर्ने आदेश भएको अदालतका सूचना अधिकारी राजकुमार आचार्यले इन्सेक प्रतिनिधिसँगको भेटमा बताउनु भयो ।

बालकको हकमा गिरफ्तारी भएको मितिदेखि प्रहरी हिरासत र आफन्तको जिम्मामा रहेको समयलाई कैद सजाय नै कायम गरी बाँकी कैदलाई स्थगन गर्ने गरी आदेश भएको आचार्यले बताउनु भयो ।

पीडित बालिकालाई आरोपितद्वयले ०७६ चैत ४ गते बलात्कार गरेको आरोपमा पीडित पक्षले आरोपितविरूद्ध चैत ६ गते जिल्ला प्रहरी कार्यालयमा उजुरी दिएको थियो ।

पीडित पक्षको उजुरीका आधारमा प्रहरीले आरोपितद्वयलाई चैत ६ गते घरबाटै गिरफ्तार गरी कानुनी कारबाही अघि बढाएको थियो ।

जिल्ला अदालतले ०७७ वैशाख २० गते कोरोना भाइरसको महामारीका कारण बालसुधार गृहमा पठाउने अवस्था नभएपछि पुर्पक्षका लागि अभिभावकलाई जिम्मा लगाउने आदेश दिएको थियो ।

पीडित बालिकाको स्वास्थ्य परीक्षण जिल्ला अस्पतालमा ०७६ चैत ६ गते गरिएको थियो ।

भरत खड्का