बलात्कार गरेको कसुरमा १२ वर्ष कैदको फैसला

  ०७६ मङ्सिर १९ गते

१३ वर्षीया बालिकालाई बलात्कार गरेको आरोपमा बाल सुधार गृहमा रहेका १६ वर्षीय बालकलाई जिल्ला अदालत ललितपुरको बाल इजलासले मङ्सिर १८ गते १२ वर्ष कैद सजाय गर्ने फैसला गरेको छ ।

आरोपित बालक भएकाले अपराध संहिता २०७४ को दफा २१९ (ख) बमोजिम आधा सजाय निर्धारण गरेको अदालतले जनाएको छ ।

न्यायाधीश महेन्द्रबहादुर कार्कीको इजलासले कसुर ठहर गर्दैे उक्त फैसला सुनाएको जिल्ला अदालत ललितपुरका श्रेष्तेदार नगेन्द्रकुमार कालाखेतीले बताउनु भयो ।

पीडित बालिकालाई आरोपितले गत जेठ १४ गते बलात्कार गरेको भन्दै पीडित पक्षले जेठ १६ गते महानगरीय प्रहरी परिसर, जावलाखेलमा उजुरी दिएको थियो ।

प्रहरीले आरोपितलाई जेठ १६ गते नै गिरफ्तार गरेको थियो । पीडित बालिकाको स्वास्थ्य परीक्षण जेठ १६ गते नै पाटन अस्पताल ललितपुरमा गरिएको थियो ।


दीपकप्रसाद घिमिरे