बलात्कार गरेको कसुरमा ११ वर्ष कैदको फैसला

  ०७६ कात्तिक २० गते

३१ वर्षीया महिलालाई बलात्कार गरेको कसुरमा जिल्ला अदालत चितवनले कात्तिक २० गते भरतपुर महानगरपालिका–१२ का विजय सुनार, भरतपुर मनपा–१२ का सागर गौतम बिक, भरतपुर मनापा– १२ कै निशान गुरुङ र भरतपुर मनपा–८ का सुजन पौडेललाई ११ वर्ष कैदसँगै १ लाख रुपियाँ क्षतिपुर्ति भराउने फैसला गरेको छ ।

अदालतका श्रेष्तेदार रुद्रमणी गिरीले न्यायाधीश अवनी मैनाली भटटराईको इजलासबाट उक्त फैसला भएको बताए ।

बलात्कार घटनामा ६-६ वर्ष कैद र सामूहिक बलात्कार भएकाले प्रत्येकलाई पुन ५-५ वर्ष थप भएको उनले बताए ।

आरोपितहरूमध्ये निशान गुरुङलाई थप एक महिना कैद र ७ हजार १ सय रुपियाँ जरिबाना गराउने समेत फैसला भएको छ । यस घटनामा चार जना संलग्न रहेकोमा सागर गौतम फरार रहेकाले मुद्दा मुल्तवीमा राखिएको छ ।

पीडित महिलालाई आरोपितहरूले ०७४ असोज ४ गते निशान गुरुङ र सागर गौतम बिकले म्याजिक भ्यानमा राखी जङ्गलतर्फ लगेर बलात्कार गरेको पीडित पक्षको आरोप थियो ।

पीडित पक्षको उजुरीका आधारमा प्रहरीले आरोपितहरूलाई असोज ५ गते गिरफ्तार गरेको थियो । पीडित महिलाको स्वास्थ्य परीक्षण ०७४ असोज ८ गते भरतपुर अस्पतालमा गरिएको थियो ।


दिपेन्द्र अधिकारी