समाचारहरू

२२ वर्षीया महिलालाई बलात्कार गरेको कसुरमा सूर्यगढी गाउँपालिका–९ का २८ वर्षीय सोमबहादुर तामाङलाई जिल्ला अदालतले ११ वर्ष कैद सजाय सुनाएको छ ।

जिल्ला न्यायाधीश उमेशप्रसाद लुँइटेलको फागुन १० गतेको इजलासले बलात्कार घटनामा तामाङलाई दोषी ठहर गर्दै ११ वर्ष कैद सजाय, ३० हजार रुपियाँ जरिबाना र ३० हजार रुपियाँ पीडितलाई क्षतिपूर्ति भराउने फैसला गरेको अदालतका श्रेस्तेदार इन्द्रकुमार खड्काले जानकारी दिनुभयो ।

तामाङले २०७५ कात्तिक २८ गते बलात्कार गरेको भन्दै पीडित महिलालेले जिल्ला प्रहरी कार्यालयमा ०७५ कात्तिक ३० गते उजुरी दिएकी थिइन् । उजुरी प्राप्त भएपछि प्रहरीले तामाङलाई सोही दिन प्रहरीले गिरफ्तार गरेको थियो ।

तामाङलाई जिल्ला अदालतको ०७५ मङ्सिर २३ गतेको आदेशले पुर्पक्षको लागि थुनामा पठाएको थियो ।

पीडित महिलाको स्वास्थ्य परीक्षण कात्तिक ३० गते त्रिशुली जिल्ला अस्पतालमा गरिएको थियो ।

 

नवदीप श्रेष्ठ