समाचारहरू

१४ वर्षीया बालिकालाई बलात्कार गरेको कसुरमा जिल्ला अदालतले चापाकोट नगरपालिका–४  का २१ वर्षीय बिनोद दर्जीलाई १० वर्ष कैद सजायको फैसला गरेको छ ।

जिल्ला अदालत स्याङ्जाका न्यायाधीश सुर्य बहादुर थापाको ०७७ फागुन ४ गतेको इजालसले कसुर ठहर गर्दै जबरजस्ती करणी कसुरमा १० वर्ष कैदको फैसला सुनाएको श्रेस्तेदार विश्वप्रसाद रेग्मीले इन्सेक  प्रतिनिधिलाई जानकारी दिनुभयो ।

पीडितलाई आरोपितले ०७६ चैत २२ गते बलात्कार गरेको भन्दै पीडित पक्षले चैत २३ गते जिल्ला प्रहरी कार्यालय स्याङ्जामा उजुरी दिएका थिए । पीडित पक्षको उजुरीपछि आरोपितलाई सोही दिन  गिरफ्तार गरेको थियो ।

पीडितको स्वास्थ्य परीक्षण चैत २३ गते जिल्ला अस्पताल स्याङ्जामा गरिएको थियोे ।

प्रहरीले आरोपितविरुद्ध चैत २४ गते जिल्ला अदालत स्याङ्जामा जबरजस्ती करणी शीर्षक अन्तरगत मुद्दा दर्ता गरेपछि  जिल्ला अदालतले आरोपितलाई वैशाख १६ गते पुर्पक्षका लागि थुनामा पठाएको थियो ।

तिलकुमारी थापा