बलात्कार गरेको कसुरमा सात वर्ष कैद सजायको फैसला

  ०७७ पुस २३ गते

२५ वर्षीया युवतीलाई बलात्कार गरेको कसुरमा जिल्ला अदालतले चौदण्डीगढी नगरपालिका–१० का ४० वर्षीय पुरूषोत्तम कार्कीलाई पुस २३ गते सात वर्ष कैद सजायको फैसला सुनाएको छ ।

न्यायाधीश माधवप्रसाद सुवेदीको इजलासले कसुर गरेको ठहर गर्दै कैद सजायसँगै पीडितले पाउने गरी २५ हजार रुपियाँ क्षतिपूर्ति भराउन र १ हजार ३ सय रुपियाँ कसुरदारबाट असुल गरी पीडित राहत कोषमा जम्मा गर्न आदेश भएको अदालतका सूचना अधिकारी राजकुमार आचार्यले इन्सेक प्रतिनिधिसँगको फोन सम्पर्कमा बताउनु भयो ।

पीडित युवतीलाई आरोपितले ०७६ माघ ८ गते बलात्कार गरेको आरोपमा पीडित पक्षले आरोपितविरूद्ध माघ ९ गते इलाका प्रहरी कार्यालय बेल्टारमा उजुरी दिएको थियो ।

पीडित पक्षको उजुरीका आधारमा आरोपितलाई प्रहरीले माघ ९ गते गिरफ्तार गरी कानुनी कारबाही अघि बढाएको थियो ।

आरोपित जिल्ला अदालतको ०७६ फागुन ६ गतेको आदेशमा पुर्पक्षका लागि थुनामा थिए ।

पीडितको स्वास्थ्य परीक्षण जिल्ला अस्पतालमा माघ ९ गते गरिएको थियो ।


भरत खड्का