बलात्कार गरेको कसुरमा सात वर्ष कैदको फैसला

  ०७७ पुस १७ गते

१६ वर्षीया बालिकालाई बलात्कार गरेको कसुरमा जिल्ला अदालतले रुपनी गाउँपालिका–६ वीरेन्द्र बजारका २० वर्षीय मुन्ना मण्डल भनिने बेदप्रकाश मण्डललाई पुस १५ गते सात वर्ष कैद सजायको फैसला सुनाएको छ ।

न्यायाधीश इश्वरमणी ओझाको इजलासले मण्डललाई दोषी ठहर गर्दै यस्तो फैसला गरेको अदालतका सूचना अधिकारी हेमबहादुर बुढाथोकीले जानकारी दिनु भयो ।

जिल्ला अदालतको आदेशमा मण्डल ०७६ असार १ गतेदेखि पुर्पक्षका लागि राजविराज कारागारमा रहेको प्रहरीले जनाएको छ ।

रुपनी गाउँपालिका–६ स्थित परीक्षा केन्द्र रहेको जनचेतना उच्च मावि, तेरहौतामा केटा साथी कञ्चनरुप नपा–११ ठेलियाका १८ वर्षीय भगानन्द चौधरीले बोलाएर गएकी बालिकालाई ६ जना आरोपितले बलात्कार गरेको भन्दै पीडितले जिल्ला प्रहरी कार्यालयमा ०७६ जेठ ५ गते उजुरी दिएकी थिइन् ।

कक्षा ११ को परीक्षा दिन पीडित बालिका रुपनी गाउँपालिका–६ स्थित आफन्तको घरमा बसेकी थिइन् ।

राति ७ बजेदेखि १० बजेसम्म आरोपितहरुले सामूहिक बलात्कार गरेपछि बेहोस भएकी पीडित राति ११ बजे घर पुगेको पीडित परिवारले जनाएको थियो ।

पीडित बालिकाको स्वास्थ्य परीक्षण राजविराजस्थित गजेन्द्रनारायण सिंह अस्पतालमा ०७६ जेठ ५ गते भएको थियो ।

प्रहरीले आरोपितमध्ये बेदप्रकाश मण्डललाई ०७६ जेठ ५ गते गिरफ्तार गरेको थियो । गिरफ्तार आरोपितले दिएको बयानका आधारमा प्रहरी र जिल्ला सरकारी वकिल कार्यालयले रुपनी गाउँपलिका–६ वीरेन्द्र बजारका ३७ वर्षीय दिलिपकुमार खंग, २५ वर्षीय देबनारायण मण्डल, २० वर्षीय पुकपुक भनिने सुमित मण्डल, २० वर्षीय बिद्यानन्द सरदार, २८ वर्षीय आनन्द सरदार र २८ वर्षीय ओमप्रकाश मण्डलविरुद्ध ०७६ जेठ ३० गते बलात्कारको अभियोजन पत्र दायर गरिएको थियो । अन्य आरोपितहरू हालसम्म गिरफ्तार भएका छैनन् ।


मनोहरकुमार पोखरेल