बलात्कार गरेको कसुरमा पाँच वर्षकैद फैसला

  ०७५असार ११ गते

३९ वर्षीया अपाङ्गता भएकी महिलालाई बलात्कार गरी बाल विज्याई गरेको कसुरमा १५ वर्षीय बालकलाई जिल्ला अदालतले असार ११ गते पाँच वर्षकैदको फैसला सुनाएको छ ।

न्यायाधीश राजकुमार खतिवडाको इजलासले आरोपित बालकलाई कैदसँगै १५ हजार रुपियाँ क्षतिपूर्ति भराउने फैसला गरेको जिल्ला अदालत मोरङ १ नम्बर फाँटका नायब सुब्बा हेमबहादुर बुढाथोकीले बताए ।

तर, पीडक बालक भएका कारण सुधार गृहमा राखिने र सजायमा आधा छुट हुने भएकाले उनले २ वर्ष ६ महिना कैद भुक्तान गर्नुपर्ने बुढाथोकीले बताए ।

कान नसुन्ने र बोलाईसम्बन्धी अपाङ्गता भएकी पीडित महिलालाई पीडकले वैशाख १५ गते बलात्कार गरेको आरोपमा पीडित पक्षले वैशाख १६ गते इलाका प्रहरी कार्यालय लेटाङ्गमा उजुरी दिएको थियो । प्रहरीले सोही दिन आरोपितलाई गिरफ्तार गरी मुद्दा चलाएको थियो ।

पीडित महिलाको स्वास्थ्य परीक्षण वैशाख १६ गते धरानस्थित बीपी कोइराला स्वास्थ्य विज्ञान प्रतिष्ठानमा गरिएको थियो ।


इन्दिरा भट्टराई