बम विस्फोटका मुख्य योजनाकार मानिएका विप्लवका नेता राइन गिरफ्तार

  ०७६ पुस १९ गते ।

 

धनुषा प्रहरीले नेपाल सरकारद्वारा प्रतिवन्धित नेत्रविक्रम चन्द (विप्वल) का नेता आदम राइनलाई पुस १६ गते गिरफ्तार गरेको धनुषाका एसपी रमेशकुमार बस्नेतले पुष्टि गर्नु भएको छ । राइनलाई धनुषाको पूर्वी ग्रामिण क्षेत्रबाट गिरफ्तार गरिएको भनिए पनि प्रहरीले कहाँबाट समातिएको भन्ने बारे प्रष्ट पारेका छैनन् । एसपी बस्नेतले भन्नु भयो आदम राइनलाई समाति सकिएको छ, अनुसन्धान भई रहेकाले गर्दा अहिले नै सबैकुरा बताउन सकिन्न । घटनामा अझै संलग्न हुनेहरुको खोजी हुँदैछ ।

धनुषा प्रहरीको मोस्ट वान्टेड सूचिमा रहेका आदम राइनलाई प्रहरीले महेन्द्रनगरमा भएको बम बिष्फोट घटनाको मूख्य योजनाकार रहेको ठम्याई रहेको छ । महेन्द्रनगरमा मङ्सिर २७ गते राति १२:१० बजे राजेश साहको घरको ढोकामा राखिएको कुकर बम विस्फोटमा परेर ३ जनाको मृत्यु भएको थियो भने ४ जना गम्भिर घाइते भएका थिए ।

घटनापछि मुख्य योजनाकार मानिएका विप्लव समुहका नेता आदम राइनलाई प्रहरीले मोस्ट वान्टेडको सूचीमा राख्दै खोजी गर्दै आएका थियो ।

आरोपित राइन नेकपा (विप्लव) का केन्द्रीय सदस्य रहेको प्रहरीले दाबि गरेको छ । गिरफ्तार गरिएको राइनलाई जिल्ला प्रहरी कार्यालय धनुषाको थुनामा राखेर अनुसन्धान भई रहेको धनुषाका एसपी रमेशकुमार बस्नेतले जानकारी दिनु भएको छ ।

प्राप्त जानकारी अनुसार आदमलाई प्रहरीले पुस १६ गते नै राति पक्राउ गरेको बुझिएको छ । बम विष्फोटमा परेर घरमुलि राजेश साह र आनन्द साह र प्रहरी निरीक्षक दाहाल समेतको ज्यान गएको थियो भने दुईजना घाइतेको उपचार भएको थियो ।


दिपेन्द्रप्रसाद सिंह