समाचारहरू

 रौतहट क्षेत्र नं १ बाट निर्वाचित सांसद मोहम्मद अफताव आलमलाई प्रहरीले असोज २६ गते गिरफ्तार गरेको छ ।

०६४ सालको बम काण्डमा संलग्न भएको आरोपमा उनलाई गिरफ्तार गरिएको प्रहरीले जनाएको छ । ०६४ चैत २७ गते राति रौतहटको राजपुरमा बम विस्फोट भएको थियो ।

संविधानसभाको पहिलो चुनावलाई लक्षित गरी बम बनाउँदै गर्दा विष्फोट भएको घटना लुकाउन घाइतेहरूलाई इँटा भट्टामा हत्या गरेको आरोप आलममाथि छ ।

०६४ चैत २७ गते रौतहटको राजपुरमा विस्फोटमा घाइते भएका २३ जनालाई इँटा भट्टामा जिउँदै जलाएको आरोप आलममाथि लगाइँदै आएको छ ।

पीडित परिवारले किटानी उजुरी दिए पनि प्रहरीले दर्ता गरेको थिएन । सर्वोच्च अदालतले ०६९ जेठ १६ गते उजुरी दर्ता गर्न प्रहरीलाई आदेश गरेको थियो।

“उनलाई हामीले नियन्त्रणमा लिएका छौं ।”-प्रदेश २ प्रहरी कार्यालयका डीआईजी प्रधुम्न कार्कीले भने-“पुरानो एउटा केसको अनुसन्धानको लागि उनलाई गौरबाट प्रहरीले नियन्त्रणमा लिएको हो ।”

आलमलाई जिल्ला प्रहरी कार्यालय रौतहटमै राखिएको छ । उनी रौतहट क्षेत्र नं २ बाट निर्वाचित सांसद हुन् । मन्त्री समेत भइसकेका आलम कांग्रेस जिल्ला सभापति हुँदै केन्द्रिय सदस्य समेत भइसकेका थिए ।

उक्त घटनाका सम्बन्धमा इन्सेकलगायतका संस्थाहरूले स्थलगत अध्ययन गरी ०६५ वैशाख २४ गते संक्षिप्त प्रतिवेदन सार्वजनिक गरेका थिए ।

प्रतिवेदनमा उक्त घटनाको नेपाली कांग्रेसबाहेकका सबै राजनीतिक दलहरूले निष्पक्ष छानविनका लागि आह्वान गरेका,  घटना लुकाउन आलमले घाइते भएकाहरूलाई भारतको अज्ञात स्थानमा लगि उपचार गराएको र मृत्यु भएका व्यक्तिहरूको परिवारलाई घटना विवरण नसुनाउन धम्की दिएको पीडितको भनाइ रहेको उल्लेख छ ।

इन्सेकलगायत मानव अधिकार संस्थाको रोहवरमा घटनामा मृत्यु भएकाहरूमध्ये वसि अख्तर मिँयाकी आमा रुक्साना खातुन र पिन्टु सिंह भन्ने त्रिलोक प्रताप सिंहका पिता श्रीनारायण सिंहले जिल्ला प्रहरी कार्यालय रौतहटमा महमद अफताव आलमसहित चार जनाविरूद्ध किटानी उजुरी दिएका थिए ।

उक्त उजुरी दर्ता नगराएको प्रहरीले हुलाक मार्फत दिइएको उजुरी ९ दिनपछि ०६५ वैशाख १८ गते पीडित पक्षबाट सनाखत गराई दर्ता गरेको थियो ।

'घटनालाई मिलाउन मोहमद अफताव आलमले पीडित पक्षलाई २ लाख रुपियाँ दिन खोजेको र पीडित पक्षले १० लाख रुपियाँ मागेको भन्ने भनाइ जिल्ला प्रहरी कार्यालय रौतहट गौरका एसपी लक्ष्मण न्यौपानेको भनाइ रहेको पाइयो ।'-प्रतिवेदनमा भनिएको छ । प्रतिवेदन पढ्न यहाँ क्लिक गर्नुहोस् ।

कोपिला तिमल्सिना