बन्चरो प्रहार गरी भाइ बुहारीको हत्या, आरोपित फरार

  ०७३ कात्तिक २१ गते

बेलौरी नपा- ६ मोतिपुरकी ३५ वर्षीया तुलसी भट्टलाई ५५ वर्षीय जेठाजु ईश्वरीदत्त भट्टले कात्तिक २० गते बन्चरो प्रहार गरी हत्या गरेको प्रहरीले जनाएको छ ।

जग्गासम्बन्धी विवाद भएका कारण कात्तिक २० गते राति महिनावरी भएको समयमा घरबाट केही पर गोठमा सुतिरहेको अवस्थामा आरोपितले बन्चरो प्रहार गरी हत्या गरेको जिल्ला प्रहरी कार्यालयका एसपी तुलसी अधिकारीले बताए ।

बन्चरो प्रहारबाट मृतकको टाउको, अनुहारलगायतका शरीरका विभिन्न भागमा गहिरो चोट लागेको थियो । मृतकको शव पोष्टमार्टमका लागि महाकाली अञ्चल अस्पतालमा राखिएको छ ।

जग्गासम्बन्धी विवादका कारण बुहारीको हत्या गरेको प्रहरीको प्रारम्भिक अनुसन्धानले देखाएको जिल्ला प्रहरी कार्यालय, कञ्चनपुरले जनायो । फरार रहेका हत्याका आरोपित ईश्वरीदत्त भट्टको खोजी भइरहेको पनि प्रहरीले जनाएको छ ।


कोमलनिरञ्जन भाट