बजारमा म्याद नाघेका सामान विक्री हुँदा उपभोक्ता मारमा

  ०७४ कात्तिक १ गते

जिल्लाको सदरमुकाम सिमकोटका पसलमा म्याद नाघेका बिस्कुट, चाउचाउ, हलुवा पकाउने पिठो, तेल, मसला, चिउरालगायतका सामग्री व्यापारीले विक्री वितरण गरेपनि सम्बन्धित निकायबाट अनुगमन नहुँदा उपभोक्ता मर्कामा परेका छन् ।

जिल्ला प्रशासन कार्यालयले सदरमुकामस्थित बजारमा रहेका पसलमा एक वर्षदेखि अनुगमन नगर्दा अधिकांश पसलमा म्याद नाघेका सामान विक्री वितरण भएको स्थानीयले आरोप लगाएका छन् । ०७३ असोज ९ गते सहायक प्रमुख जिल्ला अधिकारी ऋद्धिप्रकाश सिटौलाको संयोजकत्वमा बजार अनुगमन समिति गठन भएपनि एकवर्षबितिसक्दा समेत (०७४ कात्तिक १ गतेसम्म) बजार अनुगमन भएको छैन । पसलेले ग्राहकलाई बेच्न राखेकामध्ये म्याद नाघेका, कुहिएका, सडेगलेका खाद्य पदार्थ बजारमा देखिएका स्थानीयको आरोप छ ।

प्रमुख जिल्ला अधिकारी लक्ष्मीप्रसाद बास्कोटाका अनुसार यो जिम्मा सहायक प्रमुख जिल्ला अधिकारीको हो । सहायक प्रजिअ बिदामा घर गएकोले यो समस्याको समाधान हुन नसकेको र आफू भर्खरै आएकोले अन्य कुरा थाहा नभएकाले पनि यस्तो समस्या भएको उनको भनाई छ । अब तिहार सकिए लगत्तै बजार अनुगमन गर्ने उनले प्रतिबद्धता जनाए ।

प्रमुख जिल्ला अधिकारी बास्कोटाले बजारमा म्याद नाघेका मदिरा, फ्रुटीलगायतका पेय पदार्थ र औषधिसमेत विक्री वितरण भइरहेको भन्ने उजुरी प्राप्त भएकोले प्रशासन कार्यालयले अनुगमनलाई तीव्रता दिने बताए ।


नन्द सिंह