प्रहरी र स्थानीयबिच झडप, दुई जना घाइते

  ०७३ चैत २५ गते

आठराई गाउँपालिकाको सक्रान्तिबजारमा चैत २५ गते स्थानीयबासी र प्रहरीबिच झडप हुँदा प्रहरीको लाठी चार्जबाट स्थानीय ५५ वर्षीय सन्तबहादुर कार्की र आन्दोलनकारीको ढुङ्गा प्रहारबाट सशस्त्र प्रहरीका हवल्दार दिपराज राई घाइते भएका हुन् । घाइतेहरूको स्थानीय स्वास्थ्य चौकीमा उपचार भइरहेको छ ।

प्रदर्शनकारीले इलाका प्रहरी कार्यालयमा आक्रमण गरेपछि प्रहरीले पाँच राउण्ड अश्रु ग्याससमेत प्रयोग गरेको जनाएको छ । इलाम जिल्ला माइती घर भएकी १८ वर्षीया सरिता तामाङको आत्महत्या भएको भन्ने पोष्टमार्टम रिपोर्ट आएपछि माइती पक्ष र स्थानीयबासीले इलाका प्रहरी कार्यालय सक्रान्ति घेराउ गर्न जाँदा झडप भएको ह्वाकुका किशोर ईङनामले बताए ।

यहि चैत १५ गते बुकी भन्ने ठाउँको आफ्नै घरको कोठामा तामाङको शब झुण्डिएको अवस्थामा फेला परेको थियो । घटनाको प्रकृति हेर्दा आत्महत्या नभई हत्या भएको माइती पक्षले शङका गरेपछि निश्पक्ष छानबिन गर्नु पर्ने माग गर्दै स्थानीयबासी र माइती पक्ष इलाका प्रहरी कार्यालयमा प्रदर्शन गर्दै पुगेका थिए ।


भगिश्वर लिम्बु