प्रहरी र प्रदर्शनकारीबीचको झडपमा तीन जना घाइते

  ०७३ मङ्सिर १२ गते

ताहुँ गाविस-७ पाल्पाकी २४ वर्षीया बिनु थापा पुलामीको हत्यामा संलग्नलाई गिरफ्तार गरी कारबाही प्रक्रिया सुरु गर्न माग गर्दै प्रदर्शनमा उत्रेका आन्दोलनकारी र प्रहरीबिच झडप हुँदा दुईजना प्रदर्शनकारी र एक जना प्रहरी घाइते भएका छन् ।

घाइते हुनेमा प्रदर्शनकारी अमर बहादुर ठाडा र मनकुमारी राना रहेका छन् । त्यस्तै प्रहरी जवान जितेन्द्र विष्ट पनि घाइते भएका छन् । उनीहरूको जिल्ला अस्पताल पाल्पामा उपचार गरिएको छ ।

प्रदर्शनकारीले बिनुको हत्या उनकै पति दिपेन्द्र बस्यालले गरेको आरोप लगाउँदै उनलाई तत्काल गिरफ्तार गर्न माग गरेका छन् । दिपेन्द्र भने मङ्सिर ७ गतेबाट फरार रहेको प्रहरीले जनाएको छ । अनुसन्धानका लागि प्रहरीले दिपेन्द्रका बुवा लक्ष्मण बस्याल र आमा पार्वती बस्याललाई मङ्सिर ११ गते गिरफ्तार गरेको छ ।

गएको दसैँदेखि बेपत्ता विनुको शव जिल्ला प्रहरी कार्यलय पाल्पाले मङ्सिर ९ गते राम्दी घाटबाट उत्खनन् गरी माइतीको जिम्मा लगाएको थियो । दिपेन्द्र र बिनुबिच चार वर्षअघि अन्तरजातिय प्रेम विवाह भएको थियो ।

जिल्ला प्रहरी कार्यालयका एसपी हरिराज वाग्लेले अपराधमा संलग्नलाई पत्ता लगाएरै छाड्ने दृढता व्यक्त गर्दै दिपेन्द्रको खोजी भइरहेकाले आन्दोलित नहुन स्थानीइलाई आग्रह गरेका छन् ।


यज्ञमूर्ति तिमिल्सिना