प्रहरी र अधिकारकर्मी एकअर्काका परिपूरक

  ०७३ मङ्सिर २४ गते

मानव अधिकार संरक्षण र सम्बर्द्धनको लागि प्रहरीको भूमिका महत्वपूर्ण हुँदाहुँदै पनि कतिपय प्रहरीले आफ्नो हातमा रहेको पदीय अधिकारलाई दुरूपयोग गर्दा मानव अधिकार उल्लङ्घनका घटनाहरू बेला बेलामा हुने गरेको सरोकारवालाहरूले बताएका छन् ।

photo20161209nuwakot

६८ औं अन्तर्राष्ट्रिय मानव अधिकार दिवसको अवसरमा मङ्सिर २४ गते विदुरमा जिल्ला विकास समिति नुवाकोटको आयोजना र इन्सेकको संयोजनमा सञ्चालित 'मानवअधिकार संरक्षण र सम्बर्द्धनमा अधिकारकर्मीको भूमिका' विषयक कार्यशालामा नुवाकोटका डिएसपी ऋषिराम कडेलले प्रहरीले कानुनको प्रयोग गर्दागर्दै पनि अधिकारहरू उल्लङ्घन हुने भएकोले यसबाट जोगिनु ठूलो चुनौती रहेको बताए ।

'जब व्यक्तिगत रूपमा कानुनको प्रयोग गर्नु भनेको अधिकारको दुरूपयोग हो । पदको दुरूपयोग हो । यसबाट प्रहरीले जोगिनै पर्छ ।'-डिएसपी कडेलले भने-'मानव अधिकारकर्मी र प्रहरीको सहकार्य भएमा अधिकारको संरक्षण हुने र अधिकार स्थापित गराउनसमेत सहज हुनेछ ।'

photo20161209nuwakot1

कार्यक्रममा इन्सेक मध्यमाञ्चल क्षेत्रीय कार्यालयका संयोजक कृष्ण गौतमले मानव अधिकरकर्मी र प्रहरीबिच रहेको भैँसी देख्दा जोगी डराउने, जोगी देख्दा भैँसी डराउने अवस्था अब रहन नहुने बताए । उनले मानव अधिकारको सन्दर्भमा प्रहरीमा धेरै सुधार भएको र प्रहरीले मानव अधिकारलाई ख्याल गरेर काम गरिरहेको बताए ।

'मानव अधिकारकर्मी भनेका प्रहरीका शत्रु नभई मित्र हुन् । उनीहरूले प्रहरीकै अधिकारको पक्षमा पनि धेरै बोलेका छन्'-उनले भने-'मानव अधिकार संरक्षण र सम्बर्द्धनको लागि एक अर्कालाई फरक धारमा बुझ्न हुँदैन ।'

कार्यशालामा अधिवक्ता टिकाध्वज खड्काले मानव अधिकार संरक्षण र सम्बर्द्धनमा नेपालमा रहेका कानुनी व्यवस्थाको बारेमा जानकारी दिएका थिए । उनले मानव अधिकारको संरक्षण गर्ने कानुनी व्यवस्थाको पालना गर्दा अनुसन्धान प्रभावित हुन नहुने बताए । 'प्रहरीमा अनुसन्धान र अधिकार संरक्षकबिच संवेदनशील भएर काम गर्नु पर्ने जिम्मेवारी रहेको छ । जिम्मेवारी निर्वाह गर्दा गम्भीर हुनुपर्छ'-उनले भने ।

कार्यक्रममा निमित्त स्थानीय विकास अधिकारी शैलेन्द्र भण्डारी, विदुर नगरपालिकाका कार्यकारी अधिकृत भीमकान्त पौडेल, नेपाल पत्रकार महासङ्घका उपाध्यक्ष श्रीराम नेपाल, महिला मानव अधिकार रक्षक सञ्जालकी अध्यक्ष शर्मिला थापामगर, गैरसरकारी संस्था महासङ्घका सदस्य विनोद दाहाललगायतले मानव अधिकारको संरक्षणमा प्रहरी र अधिकारकर्मीको भूमिका एक सिक्काका दुई पाटो जस्तो एक अर्काको परिपूरकको रूपमा रहने भएकोले दुवै पक्षले आआफ्नो क्षेत्रबाट योगदान दिन सके मात्र मानव अधिकारको संरक्षण हुने धारणा राखेका थिए ।

कार्यशालामा ३० जना प्रहरी र जिल्लाका मानव अधिकारकर्मीहरूको सहभागिता रहेको थियो ।


नवदीप श्रेष्ठ