प्रहरीले नियन्त्रणमा लिएर कुटपिट गरेको पीडित निर्माण व्यवसायीको आरोप

  ०७६ असार १७ गते

हिलिहाङ गाउँपालिका–६ का निर्माण व्यवसायी ३५ वर्षीय रविन्द्र लावतीलाई असार १६ गते इलाका प्रहरी कार्यालयका सई भीम थेबेले कुटपिट गरेको पीडितले आरोप लगाएका छन् ।

हिलिहाङ गाउँपालिकाको कार्यालय नजिकै भएको एक कार्यक्रममा दुई जनाबीच विवाद हुँदा सई थेबेले कुटपिट गरेको पीडितको आरोप छ ।

सई थेबेले लावतीले आफूविरूद्ध नकारात्मक हल्ला फैलाएको र सोको बारेमा सोधखोज गर्दा पहिले हात लगाएपछि नियन्त्रण गर्ने क्रममा घटना भएको बताए । स्थानीयले भने सई थेबेले पीडितलाई नियन्त्रणमा लिइसकेपछि कुटपिट गरेको बताएका छन् ।

शरीरभरी निलडाम लागेका पीडित र नाकमा चोट लागेका सई दुवै जनाको उपचार असार १६ गते जिल्ला अस्पतालमा गरिएको छ ।

प्रहरीले पीडितलाई असार १६ गते नै गिरफ्तार गरेको छ । घटनाको सत्य तथ्य पत्ता लगाउन दुवै जनालाई जिल्ला प्रहरी कार्यालयमा राखिएको र अनुसन्धान भइरहेको सो कार्यालयका डिएसपी नरेन्द्र कुँवरले बताए । अनुसन्धानमा प्रहरीको गल्ती देखिए कानुन अनुसार कारबाही गरिने पनि उनले बताए ।


मङ्गल बेघा