समाचारहरू

प्रहरीले उजुरी दर्ता गर्न नमानेपछि सप्तरी जिल्ला अदालतमा साउन २२ र २३ गते घरेलु हिंसाको तीनवटा उजुरी दर्ता भएको छ । बोदे बर्साइन नपा–१ धनगढीकी ५० वर्षीया अनीताकुमारी चौधरीले उनका जेठाजु ५८ वर्षीय प्रभुनारायण चौधरीविरूद्ध जिल्ला अदालतमा साउन २३ गते उजुरी दर्ता गरेकी छिन् ।

प्रहरी चौकी सिस्वामा असार ३२ गते दिएको उजुरीमा कुनै कारबाही नभएपछि सप्तरी जिल्ला अदालतमा उजुरी दर्ता गरेको पीडितले बताइन् ।

आरोपितले आक्रोशमा आई असार २१ गते बाँसको लाठीले कुटी गम्भीर घाइते बनाएको पीडितले बताइन् । कुटपिटबाट घाइते पीडितको सिरहाको लहान नपा–३ स्थित त्रिदेव पोलिक्लिनिक र गणेश चश्मा घर तथा गजेन्द्रनारायण सिंह सगरमाथा अञ्चल अस्पताल राजविराजमा उपचार भएको छ ।

यसैगरी कञ्चनरूप नपा–९ धरमपुरकी २९ वर्षीया सुभद्रादेवी रामले उनकी सासू ६५ वर्षीया रामवतीदेवी राम, देवर २५ वर्षीय सन्तोष राम र निजकी पत्नी २३ वर्षीया उर्मिलादेवी रामविरूद्ध जिल्ला अदालतमा साउन २२ गते उजुरी दर्ता गरेकी छिन् ।

अंश भाग खोजे ज्यान मारिदिने धम्की दिँदै आरोपितहरूले असार १४ गते घरमा पति नभएका बेला गालीगलौज, कुटपिट गरी घाइते बनाएको भन्दै पीडितले उजुरी दिएको जिल्ला अदालतले जनाएको छ ।

कुटपिटबाट घाइते भएपछि गाउँलेहरूले ज्यान जोगाएको पीडितले बताइन् । पीडितले इलाका प्रहरी कार्यालय कञ्चनरूपमा उजुरी दिई असार १७ गते प्राथमिक स्वास्थ्य केन्द्र कञ्चनरूपबाट घाउजाँच परीक्षण गराए पनि उजुरी दर्ता नगरेपछि अदालतमा उजुरी दर्ता गराएको बताइन् ।

यस्तै कञ्चनरूप नपा–९ धरमपुरकी ६३ वर्षीया पारोदेवी यादवले उनका पति ६५ वर्षीय हरीलाल यादव, छोरा ३० वर्षीय सुबन यादव र निजकी पत्नी २५ वर्षीया विनीतादेवी यादवविरूद्ध जिल्ला अदालतमा साउन २२ गते घरेलु हिंसाको उजुरी दर्ता गराएकी छिन् ।

आरोपितहरूले मिलोमतो गरी अंश खोजे कुटेर ठिक पार्छौँ भनी ०७५ जेठ २२ गते निर्घात कुटपिट गरेको पीडितले आरोप लगाएकी छन् । आरोपितहरूले ०७४ कात्तिक ९ गते समेत कुटपिट गरेपछि पीडितले इलाका प्रहरी कार्यालयमा ज्यान मार्ने उद्योगको उजुरी दिएकी थिइन् । सो घटनामा आरोपितहरूले कुटपिट नगर्ने भनी लिखित सहमति गरेपनि पुनः कुटपिट गरेको पीडितले जानकारी दिइन् । जिल्ला अदालतले तीनै जना पीडितलाई कुटपिट, गालीगलौज र यातना नदिई बस्न, खान, लाउन दिनु भनी साउन २४ गते आरोपितहरूका नाममा अन्तरिम संरक्षणात्मक आदेश जारी गरेको छ ।

मनोहरकुमार पोखरेल