प्रहरीले चलाएको गोली लागी एक जना घाइते

  ०७६ भदौ १८ गते

बीरगंज महानगरपालिका–१६ का ३४ वर्षीय सन्तोष दास भदौ १७ गते राति प्रहरीले चलाएको गोली लागेर घाइते भएका छन् । उनको दायाँ गोडामा गोली लागेको छ ।

 

वडा प्रहरी कार्यालय श्रीपुरको टोलीले नियमित चेकजाँच गर्ने क्रममा प्रहरीलाई नै हतियार देखाई गोली हान्न खोजेकाले नियन्त्रणमा लिन प्रहरीले गोली प्रहार गरेको जिल्ला प्रहरी कार्यालय पर्साका डिएसपी गौतम थापाले बताए ।

 

‘बीरगंज महानगरपालिका–१६ राधेमाइमा प्रहरीले नियमित चेकजाँच गर्दै थियो । शङ्का लागेमा पैदल हिड्नेलाई पनि चेकजाँच गरिन्छ ।’–जिल्ला प्रहरी कार्यालय पर्साका डिएसपी थापाले भने–‘चेकजाँचकै क्रममा प्रहरीलाई हतियार देखाई छलेर भाग्न खोज्दा गोली हान्नु पर्‍यो ।’

 

दासको साथबाट एउटा पेस्तोल र १७ राउण्ड गोली पनि बरामद गरिएको प्रहरीले जनायो । घाइते दासको उपचार प्रहरी निगरानीमा बीरगंजस्थित नारायणी उपक्षेत्रीय अस्पतालमा भइरहेको छ । उनका बारेमा थप अनुसन्धान भइरहेको डिएसपी थापाले बताए ।


केसी लामिछाने