प्रहरीले अनावश्यक दुःख दिएको विप्लव नेतृत्वको नेकपाका कार्यकर्ताको आरोप

  ०७६ वैशाख १० गते

नेत्रविक्रम चन्द (विप्लव) नेतृत्वको नेपाल कम्युनिष्ट पार्टीको गतिविधिमा संलग्न भएको आरोपमा गिरफ्तारपछि रिहा भएका सो पार्टीका दुई जना कार्यकर्ताले आफूहरूलाई प्रहरीले अनावश्यक दुःख दिने गरेको आरोप लगाएका छन् ।

पटकपटक गिरफ्तारपछि रिहा गरिएका सो पार्टी निकट अखिल क्रान्तिकारीका केन्द्रीय सचिवालय सदस्य जाजरकोट जिल्ला बारेकोट गाँउपालिका–२ का ३२ वर्षीय धनबहादुर नेपाली र ०७५ चैत १३ गते गिरफ्तारपछि ०७६ वैशाख ३ गते रिहा गरिएका सुर्खेत वीरेन्द्रनगर नपा–८ का ६१ वर्षीय सिद्धबहादुर खड्काले इन्सेक कर्णाली प्रदेश कार्यालय सुर्खेतमा वैशाख १० गते निवेदन दिई यस्तो आरोप लगाएका हुन् ।

नेपाली र खड्काले दिएको संयुक्त निवेदनमा आफूहरू प्रहरी हिरासत मुक्त हुँदा पार्टी परित्याग गरी स्वतन्त्र भई बस्ने विज्ञप्ति जारी गर्नुको साथै सञ्चार माध्यम तथा सामाजिक सञ्जाल फेसबुकमा प्रचारप्रसार भइसकेपनि प्रहरीले आपूmहरूको खोजी गरिरहेको, जिल्ला प्रहरी कार्यालयमा आउन र संयुक्त रूपमा पे्रस विज्ञप्ति जारी गर्न दबाब दिइरहेको उल्लेख छ ।

सादा पोशाकमा रहेका प्रहरीले आफूहरूले जारी गरेको विज्ञप्ति लिएर गइसकेपनि हिरासत मुक्तपछि पनि पिछा गरिरहेको र पटकपटक फोन गरेर जिल्ला प्रहरी कार्यालयमा आउन दबाब दिइरहेकाले यसबाट मुक्तिका लागि पहल गरिदिन उनीहरूले निवेदनमार्फत इन्सेकलाई अनुरोध गरेका छन् ।

जिल्ला प्रहरी कार्यालय सुर्खेतका एसपी बसन्त रजौरेले हिरासत मुक्त हुँदा नेपाली र खड्काले जारी गरेको पे्रस विज्ञप्ति लिएर आउन उनीहरूलाई भनेको बताए ।


दुर्गा थापा