प्रहरीद्वारा सात जना बालबालिकाको उद्धार

  ०७६ साउन २४ गते

तिब्बतीयन नागरिकले गैरकानुनी रूपमा काठमाडौँ लैजाने भनेर जुफाल विमानस्थलमा पुर्‍याइएका काइके गाउँपालिकाका सातजना बालबालिकालाई साउन २३ गते विमानस्थल प्रहरीले फर्काएर परिवारको जिम्मा लगाएको छ ।

काठमाडौँको जोरपाटीमा सञ्चालित छुतसाङ गुम्बामा पढाउन लैजाने क्रममा नौ वर्षदेखि १३ वर्ष उमेर समूहका सातजना बालबालिका कानुनी प्रक्रिया नपुगेको भन्दै प्रहरीले फिर्ता गरेको हो ।

प्रहरीले फिर्ता गरिएका बालबालिकाहरूमा काइके गाउँपालिका–७ का दुईजना, वडा नम्बर ६ का चारजना र मुड्केचुला गाउँपालिका–७ का एक जना गरेर सातजना रहेका छन् ।

गैर कानुनी रूपमा बालबालिका लैजाने नागरिक काठमाडौँ जोरपाटीस्थित छुतसाङ गुम्बाका लामा रहेको र उनी तिब्बतीयन नागरिक भएको प्रहरीले जनाएको छ ।

सम्बन्धित गाउँपालिकाको वडा कार्यालयले बालबालिका लैजानका लागि सिफारिश गरेको भएपनि शिक्षा समन्वय र जिल्ला प्रशासनको अनुमति बिना ठुलो सङ्ख्यामा बालबालिका जिल्ला बाहिरा लैजाँदै गरेको भेटिएपछि प्रहरीले परिवारमाझ फिर्ता गरेको डोल्पाका प्रमुख जिल्ला अधिकारी, मुकेशकुमार केशरीले बताए ।

बालबालिका लैजाने नागरिक तिब्बतीयन भएको र जोरपाटीमा रहेको भनिएको गुम्बाको आधिकारिक अवस्था बारे बुझेर मात्र बालबालिका पठाइने प्रमुख जिल्ला अधिकारी केशरीले बताए ।

आफूहरूको आर्थिक अवस्था कमजोर रहेको र पढाउन सक्ने अवस्था नभएको बेला निशुल्क रूपमा लामा पढाइदिन्छु भनेपछि सहमतिमै बालबालिका पठाएको तर गुम्बा आधिकारिक छ छैन भन्ने थाहा नभएको अभिभावक राजेन्द्र कामीले बताए ।


विष्णुप्रसाद देवकोटा