प्रहरीको कुटपिटबाट एक बालक घाइते

  ०७४ माघ १३ गते

बिर्तामोड नपा-४ का १४ वर्षीय सन्दिप प्रसाईलाई प्रहरीले कुटपिट गर्दा गम्भीर घाइते भएका छन् । पीडित बालकको उपचार बिर्तामोडस्थित बिएण्डसी अस्पतालमा भइरहेको छ ।

घटना विवरण अनुसार माघ ११ गते राति ९ बजे साथिको घरबाट आई आफ्नो घरको गेटबाट पस्नै लाग्दा मोटरसाइकलमा आएका सादा पोशाकका प्रहरीहरूले गिरफ्तार गरेर इलाका प्रहरी कार्यालय बिर्तामोड लगेका थिए पीडित बालकलाई प्रहरीले राति ११ बजेसम्म कुटपिट गरेर घाइते बनाई त्यसपछि घर नजिकै बाटोमा ल्याएर छाडिदिएको पीडितका बावु गोपाल प्रर्साईले बताए । छोराको हातगोडा र शरीरमा चोटपटक रहेको उनले बताए ।

घटनाको विषयमा इलाका प्रहरी कार्यालय बिर्तामोडका इञ्चार्ज कृष्णप्रसाद कोइरालाले जानकारी नभएको बताउँदै आरोपित दोषी देखिए कारबाही गरिने बताए ।

पीडित पक्षबाट आरोपितलाई कारबाहीको माग गर्दै माघ १३ गते बिहान उजुरी आएपछि मात्रै घटनाका बारेमा जानकारी भएको कोइरालाले बताए ।

घटनाका सम्बन्धमा जानकारी आएपछि इन्स्पेक्टरको नेतृत्वमा छानबिन समिति तयार गरी घटनाको अनुसन्धान सुरू गरिएको उनले बताए ।


अर्जुन बस्नेत