समाचारहरू

प्रदेश ३ मा डेङ्गुको प्रकोप बढ्दै गएको भन्दै सत्तारूढ दल नेपाल कम्युनिष्ट पार्टीका मुख्य सचेतक रामेश्वर फुँयालले प्रदेश सभाको बैठकमा जरूरी सार्वजनिक महत्वको प्रस्ताव पेश गरेका छन् ।

नेपाली कांग्रेसकी प्रमुख सचेतक राधा घले र नेकपाकी सांसद कञ्चन खनालको समर्थनमा भदौ २४ गते पेश गरिएको प्रस्तावमाथि २० जना प्रदेश सभा सदस्यहरूले छलफल गरेका थिए ।

सांसदहरूले लामखुट्टेको टोकाइको कारण हुने डेङ्गुको नियन्त्रणसँगै अस्पतालहरूले डेङ्गु परीक्षण गर्ने क्रममा किटको मनलाग्दी रकम उठाएको प्रति सरकारले ध्यान दिनुपर्ने बताएका छन् ।

प्रदेश सभा सदस्यहरूले सबैले आ-आफ्नो तहबाट डेङ्गु नियन्त्रण गर्न सर्वसाधारणलाई आग्रह पनि गरेका छन् ।

जरुरी सार्वजनिक महत्वको प्रस्तावमाथि छलफलमा उठेको विषयको जबाफ दिँदै प्रदेश ३ का सामाजिक विकास मन्त्री युवराज दुलालले प्रदेश ३ मा भदौ २२ गते साँझसम्म २ हजार १० जनालाई डेङ्गुको सङ्क्रमण भएको जानकारी दिए ।

उनले प्रदेश ३ का जिल्लामध्ये सबैभन्दा धेरै चितवनामा १ हजार ३६ जना, मकवानपुरमा ६ सय २४, काठमाडौँमा २ सय ५४, ललितपुरमा ३२, काभ्रेमा चार, भक्तपुरमा ३३, धादिङमा १८, सिन्धुपाल्चोकमा दुई, रामेछापमा दुई, दोलखामा दुई, सिन्धुली र नुवाकोटमा एक/एक जनालाई डेङ्गुको सङ्क्रमण देखिएको बताए ।

यस्तै प्रदेश ३ को रसुवा जिल्लामा भने हालसम्म डेङ्गु नदेखिएको भन्दै मन्त्री दुलालले सांसदहरूलाई जबाफ दिँदै प्रदेश स्तरकै सक्रियतामा स्वास्थ्य मन्त्रालयको स्वास्थ्य महाशाखा, सम्बन्धित जिल्लाका जिल्ला जनस्वास्थ्य कार्यालय र स्थानीय तहहरूको स्वास्थ्य शाखासँग समन्वय गरी डेङ्गु नियन्त्रणको लागि अभियान सञ्चालन थालिएको बताए ।

पुष्पराज अधिकारी