समाचारहरू

कर्णाली प्रदेश सरकारले प्राकृतिक प्रकोपबाट ज्यान गुमाउने कर्णालीका नागरिक र प्रदेशमा कार्यरत सरकारी कर्मचारीका परिवारलाई सामूहिक विपद जोखिम दुर्घटना बीमा वापत दुई लाख रुपियाँ रकम उपलब्ध गराउने भएको छ ।

कर्णाली प्रदेश सरकारले चैत १ गतेदेखि लागु हुने गरी सो बीमा रकम उपलब्ध गराउने भएको हो । आन्तरिक मामिला तथा कानुन मन्त्रालयले फागुन ३० गते पत्रकार सम्मेलन गरी कर्णाली प्रदेशका नागरिक र कर्मचारीका परिवारलाई सामूहिक विपद जोखिम दुर्घटना बीमा उपलब्ध गराउने जानकारी दिएको हो ।

चालु आर्थिक वर्ष ०७६÷७७ को बजेट नीति तथा कार्यक्रम अनुसार असोज १ गतेदेखि कर्णाली प्रदेशका नागरिकका लागि एक लाख रुपियाँ सामूहिक विपद जोखिम दुर्घटना बीमा घोषणा गरेकोमा कर्णाली प्रदेश सरकारले चैत १ गतेदेखि लागु हुने गरी यहाँका नागरिक र कर्मचारीका परिवारलाई समेत सो बीमा रकम उपलब्ध गराइने आन्तरिक मामिला तथा कानुन मन्त्री नरेश भण्डारीले बताउनु भयो ।

प्राकृतिक प्रकोपबाट सबैभन्दा बढी प्रभावित रहेको कर्णालीका बासिन्दालाई राहत तथा यहाँ कार्यरत कर्मचारीको मनोबल अभिबृद्धि गर्न प्रदेश सरकारले सामूहिक विपद जोखिम दुर्घटना बीमा अघि सारेको र यसका लागि १ करोड ५० लाख रुपियाँ बजेट विनियोजन गरिएको मन्त्री भण्डारीले जानकारी दिनु भयो । उहाँका अनुसार प्रदेश सरकारले प्रत्येक नागरिक तथा कर्मचारीहरूको तर्फबाट बीमा बापतको आठ रुपियाँ ४८ पैसा राष्ट्रिय बीमा कम्पनीलाई प्रिमियम गरिसकेको छ ।

बिमितको कर्णाली प्रदेश भन्दा बाहिर मृत्यु भएमा र अन्य प्रदेशका नागरिक यस प्रदेशमा मृत्यु भएमा बीमा वापतको रकम पाउने छैनन । तर ६ महिनादेखि कर्णाली प्रदेशमा कार्यरत सरकारी कर्मचारीको प्राकृतिक प्रकोपमा परी मृत्यु भएमा भने उनका परिवारले सो वापतको रकम पाउने छन ।

पत्रकार सम्मेलनमा राष्ट्रिय बीमा कम्पनीका कार्यकारी अधिकृत डा.डिल्लीराज अर्यालले नाफा भन्दा पनि कर्णाली प्रदेश सरकारले अघि सारेको यस खालको गौरबको कार्यक्रमलाई सहयोग तथा सबै नागरिकसम्म बीमाको पहूँच पु¥याउने उद्देश्यले यसलाई सहयोग गर्न बीमा कम्पनी तयार रहेको बताउनु भयो ।

 

दुर्गा थापा