प्रतिबन्धित नेकपा निकट विद्यार्थी सङ्गठनद्वारा चार ओटा शिक्षण संस्थामा कालो व्यानर

  ०७६ साउन १५ गते

नेत्रविक्रम चन्द (विप्लव) नेतृत्वको प्रतिबन्धित नेपाल कम्युनिष्ट पार्टी निकट अखिल क्रान्तिकारीले साउन १२ गते राति चार ओटा शिक्षण संस्थामा कालो ब्यानर टाँगेको छ ।

उक्त सङ्गठनले तिलोत्तमा नपा भलवारीस्थित नमस्ते एकेडेमी, सैनामैना नपास्थित न्यू एकेडेमी इङ्लिस बोर्डिङ स्कुल, देवदह नपास्थित सगरमाथा अङ्ग्रेजी बोडिङ स्कुल र बुटवल नपा कालिकानगरस्थित सञ्जिवनी नर्सिङ्ग कलेजमा त्यस्तो व्यानर टाँगेको हो ।

सङ्गठनले व्यानरमा विद्यार्थीहरूसँग अत्यधिक शुल्क लिएको, विभिन्न बहानामा शुल्क लिएको, शिक्षा ऐनले तोकेको छात्रवृत्ति र विद्यार्थीहरूका हितका कार्यक्रमहरू कार्यान्वयन नगरेको, अखिल क्रान्तिकारी र शिक्षा मन्त्रालयबीच भएको सहमति कार्यान्वयन नगरेको, विदेशी लगानीमा सञ्चालन भएको आरोप लगाएको छ ।

उक्त सङ्गठनले व्यानरमा शैक्षिक माफियाद्वारा सञ्चालित कलेज र स्कुललाई सामाजिक बहिस्कार गर्न अपिल गरेको छ ।


रीमा बि.सी.