प्रतिबन्धित नेकपाका मोरङ इञ्चार्ज गिरफ्तार

  ०७७ माघ ८ गते

नेत्रविक्रम चन्द (विप्लव) नेतृत्वको प्रतिबन्धित नेपाल कम्युनिष्ट पार्टीको मोरङ इञ्चार्ज ३२ वर्षीय धनबहादुर विकलाई गिरफ्तार गरेको प्रहरीले जनाएको छ ।

सङ्खुवासभा, मादी नगरपालिका–४ स्थायी घर भई बुढीगङ्गा गाउँपालिका–४ मोरङमा पार्टी गतिविधि सञ्चालन गरिरहेको अवस्थामा माघ ७ गते विकलाई गिरफ्तार गरेको जिल्ला प्रहरी कार्यालयका डिएसपी मानबहादुर राईले इन्सेक प्रतिनिधिसँगको फोन सम्पर्कमा बताउनु भयो ।

गोप्य सूचनाका आधारमा प्रतिबन्धित पार्टीका मोरङ इञ्चार्ज डिवि सिलवाल भनिने धनबहादुर बिकलाई गिरफ्तार गरिएको डिएसपी राईले बताउनु भयो ।

विकको साथबाट अटोमेटिक पेस्तोल एक थान, म्याग्जिनमा लोड गरिएको अवस्थामा रहेको तीन राउण्ड गोली, विभिन्न कम्पनीका चार थान मोवाइल फोन र सिमकार्ड नियन्त्रणमा लिएको डिएसपी राईले बताउनु भयो ।

प्रारम्भिक अनुसन्धानका क्रममा विकको संलग्नता मोरङ मिक्लाजुङ्ग गाउँपालिका–१ का ५४ वर्षीय शिक्षक राजेन्द्रकुमार श्रेष्ठको हत्यामा देखिएको मोरङ प्रहरीले जनाएको छ ।

सरस्वती आधारभूत विद्यालयका शिक्षक श्रेष्ठको ०७७ मङ्सिर २३ गते घरबाट अपहरण गरी जङ्गलमा हत्या गरिएको थियो ।

मिक्लाजुङ्ग गाउँपालिका–१ बर्खे स्थित सरस्वती आधारभूत विद्यालयका शिक्षक श्रेष्ठको प्रतिकारका क्रममा हत्या भएको सो पार्टीका मेची–कोशी व्यूरो इञ्चार्ज प्रतापद्घारा मङ्सिर २३ गते जारी विज्ञप्तीमा उल्लेख छ ।

विकको स्वास्थ्य परीक्षण कोशी अस्पताल विराटनगरमा माघ ८ गते गरिएको छ ।


नेत्रप्रसाद अधिकारी