प्रतिबन्धित नेकपाका तीन जना कार्यकर्ता गिरफ्तार

  ०७६ साउन १६ गते

चन्द्रपुर नपा–३ वडा कार्यालयमा साउन १५ गते आगजनी गरेलगत्तै प्रहरीले नेत्रविक्रम चन्द (विप्लव) नतृत्वको प्रतिबन्धित नेकपाका तीन जना कार्यकर्तालाई गिरफ्तार गरी सार्वजनिक गरेको छ ।

इलाका प्रहरी कार्यालय चन्द्रनिगाहापुरले पत्रकार सम्मेलन गरी चन्द्रपुर नपा–४ चन्द्रनिगाहापुर टेकान टोलका स्थानीय ३६ वर्षीय मानबहादुर वाइवा, सोही ठाउँ बस्ने ३० वर्षीय रामबहादुर घिसिङ र चन्द्रपुर नपा–३ का ५२ वर्षीय रेवप्रसाद मैनालीलाई पत्रकार सम्मेलन गरी सार्वजनिक गरेको हो । उनीहरुलाई प्रहरीले साउन १५ गते गिरफ्तार गरेको थियोे ।

प्रहरीले चन्द्रनिगाहापुरको टेकानटोलस्थित उनीहरूको घर खानतलासी गर्दा घिसिङको घरबाट एक थान स्वचालित पेस्तोल र एक थान नलकटुवा पेस्तोलसहित १० राउन्ड गोली बरामद गरिएको इलाका प्रहरी कार्यालय चन्द्रनिगाहापुरका डिएसपी कवित कटुवालले बताए ।

चन्द्रपुर नपा–३ को वडा कार्यालयमा आगजनी गरेको घटना लगत्तै प्रहरीले वाइवा र घिसिङलाई अनुसन्धानका लागि गिरफ्तार गरेको थियो । वाइवा र घिसिङ रौतहटमा हिंसात्मक गतिविधिमा संलग्न रहेको प्रहरीको आरोप छ ।

हतियारसहित गिरफ्तार परेका वाइवा सशस्त्र द्वन्द्वका क्रममा माओवादी कार्यकर्ता थिए । घिसिङ केही महिनायता विप्लवका सहयोगी रहँदै आएको खुलेको छ ।

वाइवा पछिल्लो समयमा सुमो गाडी चालकको काम गर्दै आएका थिए । घिसिङ गाउँमै मासु पसल चलाउँदै आएका थिए ।

साउन १५ गते रौतहटको चन्द्रपुर नपा–३ वडा कार्यालयमा आगजनी भएको थियो । वडा कार्यालयमा आगजनीको घटनामा वाइवा र घिसिङको संलग्नता रहेको इलाका प्रहरी कार्यालय चन्द्रनिगाहपुरले जनाएको छ ।


कोपिला तिमल्सिना