प्रतिबन्धित नेकपाका जिल्ला सेक्रेटरी गिरफ्तार

  ०७६ फागुन २९ गते

उदयपुरगढी गाँउपालिका–४ का ५४ वर्षीय जीतबहादुर पुलामी मगरलाई प्रहरीले नेत्रविक्रम चन्द (विप्लव) नेतृत्वको प्रतिबन्धित नेपाल कम्युनिष्ट पार्टीको उदयपुर सेक्रेटरी भएको आरोपमा फागुन २९ गते गिरफ्तार गरेको छ ।

उदयपुरगढी गाँउपालिका–७ अधेरीका चित्रबहादुर खपाङ्गी मगरको घरमा लुकिछिपी बस्ने गरेको गोप्य सूचनाका आधारमा गिरफ्तार गरिएको जिल्ला प्रहरी कार्यालयका एसपी वीरबहादुर बुढामगरले बताउनुभयो ।

खपाङ्गीको घरमा बसेर विप्लव समुहको नाममा योजना बनाएको, गतिविधि बढाएको सूचना पाएपछि जिल्ला प्रहरी कार्यालयबाट खटिएको टोलीले गिरफ्तार गरेको एसपी बुढामगरले बताउनुभयो ।

०७४ सालको संसदीय निर्वाचनमा चुनाव प्रचारप्रसारका क्रममा मङ्सिर १३ गते नेपाली काँग्रेस क्षेत्र नम्बर २ का उम्मेद्ववार नारायणबहादुर कार्की लगायत ७ जनालाई लक्षित गरी उदयपुरगढी–६ दनुवारबेसी सडकमा एम्बुस थापेर अङ्गभङ्ग बनाएको आरोपमा मगरलाई गिरफ्तार गरेको एसपी बुढामगरले बताउनुभयो ।

त्यसैगरी जिल्लाका एनसेल टावर, व्यक्ति तथा कार्यालय र सडकलाई लक्षित गरी वम राखेर त्रास फैलाएका जस्ता मुद्दा आरोपितमाथि रहेको प्रहरी प्रहरीले जनाएको छ ।

 

 

 

 

 


भरत खड्का