प्रतिबन्धित नेकपाका कार्यकर्ता अदालत परिसरबाट पुनः गिरफ्तार

  ०७६ असार २३ गते

नेत्रविक्रम चन्द (विप्लव) नेतृत्वको नेपाल कम्युनिष्ट पार्टीका गोरखा जिल्ला इन्चार्ज योगेन्द्र कुमाल र जिल्ला सेक्रेटरी कपिलदेव भट्टलाई प्रहरीले असार २२ गते बेलुकी उच्च अदालत पोखरा गेटबाट गिरफ्तार गरेको छ ।

गण्डकी प्रदेश प्रहरी कार्यालय, पोखरालाई विपक्षी बनाई योगेन्द्र कुमाल र कपिल भट्टका तर्फबाट सुप्रभा भट्टले दायर गरेको बन्दी प्रत्यक्षीकरणको मुद्दामा असार २२ गते उच्च अदालतका न्यायाधीशद्वय तेजबहादुर कार्की र डालबहादुर खड्काको इजलासले रजिष्ट्रार जितेन्द्रबाबु थपलियाको रोहबरमा रिहा गर्न आदेश दिएको थियो ।

तर, आदेश लगत्तै वडा प्रहरी कार्यालय, बैदामको टोलीले उनीहरूलाई सार्वजनिक अपराध मुद्दामा गिरफ्तार गरेको हो ।

गिरफ्तार गरिएका दुवै जनालाई थप अनुसन्धानका लागि जिल्ला प्रहरी कार्यालय, कास्की पठाइने वडा प्रहरी कार्यालयका डिएसपी कोमल शाहले जानकारी दिए ।

यसअघि जिल्ला प्रशासन कार्यालय तनहुँले भट्टलाई असार ८ गते र कुमाललाई असार १३ गते जनही २ हजार रुपियाँ धरौटीमा रिहा गर्ने आदेश दिएको थियो ।

उनीहरू दुवैजना महिला प्रहरीलाई अभद्र व्यवहार गरेको मुद्दामा थुनामा थिए । धरौटी रकम बुझाएर रिहा गर्ने आदेश दिएपनि दुवै जनाले सो दिन धरौटी बुझाउन इन्कार गरेका थिए ।

असार १७ गते इन्सेकका तनहुँ जिल्ला प्रतिनिधि प्रकाशचन्द्र भट्टराईको रोहबरमा धरौटी रकम बुझाएर रिहा हुने क्रममा दुवैलाई जिल्ला प्रहरी कार्यालय, गोरखाको पत्र अनुसार तनहुँ प्रहरीले पुनः गिरफ्तार गरेको थियो ।

असार १७ गते नै गोरखा पठाइएका उनीहरू विरूद्ध गोरखामा बम विष्फोटमा संलग्न भएको मुद्दा दर्ता भएको थियो ।

यसअघि उच्च अदालत पोखराको आदेशमा जेठ १४ गते रिहा भएका भट्टलाई आँबुखैरेनी प्रहरीले सोही दिन गिरफ्तार गरेको थियो । त्यस अघि उनीहरू दुवैलाई वैशाख २७ गते गोरखाबाट प्रहरीले गिरफ्तार गरेको थियो ।


सुशन घिमिरे