प्रतिबन्धित नेकपाका कार्यकर्ता गिरफ्तार

  ०७६ साउन १७ गते

अछाम बान्नीगढी जयगढ गाउँपालिका–५ घर भइ पोखरा महानगरपालिका–१ बगर बस्ने नेत्रविक्रम चन्द (विप्लव) नेतृत्वको नेकपाका कार्यकर्ता २१ वर्षीय राजन साउदलाई प्रहरीले साउन १७ गते गिरफ्तार गरेको छ ।

 

जिल्ला प्रहरी कार्यलय कास्कीका डिएसपी राजकुमार केसीले सामान्य सोधपुछका लागि नियन्त्रणमा लिएको जानकारी दिए ।

 

‘उहाँ आफैँले म विद्यार्थी सङ्गठनमा आबद्ध छु भनेर भन्नुभएको छ । सोधपुछ पछि आवश्यक देखिएमा थप अनुसन्धानका लागि राख्न सकिन्छ ।’–डिएसपी केसीले भने ।

 

जनपत्रकार सङ्गठन कास्की जिल्ला संयोजक रमेश बास्तोलाले आफ्नो सङ्गठनका सदस्य समेत रहेका साउदको गिरफ्तारीप्रति खेद प्रकट गर्दै रिहाइको लागि पहल गरिदिन आग्रह गरेका छन् ।

 

उनले निर्वाध रूपमा प्रेस तथा अभिव्यक्ति स्वतन्त्रताको अधिकारलाई सम्मान गर्न सरकारलाई आग्रह समेत गरेका छन् ।

 

गत जेठ २५ गते अन्नपूर्ण गाउँपालिका–११ उरीबाट प्रहरीले साउद सहित १८ जनालाई गिरफ्तार गरेको थियो भने साउद सहित ५ जना असार ३० गते मानव अधिकारकर्मीहरूको पहलमा रिहा भएका थिए ।


सुशन घिमिरे