प्रतिबन्धित नेकपाका सचिवालय सदस्य सहित तीन जना गिरफ्तार

  ०७७ माघ २ गते

नेत्रविक्रम चन्द (विप्लव) नेतृत्वको प्रतिबन्धित नेपाल कम्युनिष्ट पार्टी (नेकपा) का सचिवालय सदस्य सहित तीन जनालाई प्रहरीले पुस २९ गते बागमती गाउँपालिका–७ गिम्दीस्थित खुर्मीको पुलबाट गिरफ्तार गरेको छ ।

गिरफ्तार गरिएकाहरूमा सुर्खेत जिल्ला पञ्चपुर नगरपालिका–१ निगाहापुर घर भएका सो पार्टीका सचिवालय सदस्य ५७ वर्षीय धर्मेन्द्र बास्तोला, कालिकोट जिल्ला रास्कोट नगरपालिका–३ स्युनापानीका ४२ वर्षीय विवेक कुमाल र सिन्धुली जिल्ला हरिपुर गाउँपालिकाका ३५ वर्षीय टीकाराम रखाल मगर रहेका छन् ।

बास्तोलासहित नेताहरूले राजनीतिक प्रशिक्षण सञ्चालन गरिरहेको अवस्थामा पुस २९ गते साँझ गिरफ्तार गरेको नेपाल बार एसोएसिएसन नेपालका केन्द्रीय सदस्य खिमानन्द अधिकारीले बताउनु भयो ।

त्यसक्रममा प्रहरीले एक थान ल्यापटप, आइफोन दुई थान र केही नगद समेत नियन्त्रणमा लिएको अधिकारीले जानकारी दिनुभयो ।

उनीहरूलाई माघ २ गते ललितपुर जिल्ला अदालतबाट ६ दिनको म्याद थप गरी हातहतियार तथा बिस्फोटक पदार्थसम्बन्धी मुद्दामा अनुसन्धान भइरहेको महानगरीय प्रहरी परिसर जावलाखेलका एसपी प्रज्वल महर्जनले जानकारी दिनुभयो ।


दीपकप्रसाद घिमिरे