प्रतिबन्धित नेकपाका कार्यकर्ता गिरफ्तार

  ०७६ असार १९ गते

सिलिचोङ गाउँपालिका–१ होयङ्लामा असार १६ गते बिहान प्रहरीसँग भएको गोली हानाहानपछि प्रहरीले प्रतिबन्धित नेकपाका एक कार्यकर्तालाई गिरफ्तार गरेको छ ।

नेत्रविक्रम चन्द (विप्लव) नेतृत्वको नेकपाका कार्यकर्ता चिसङ्खुगढी गाउँपालिका–७ निवासी निमदोर्जी तामाङलाईलाई असार १९ गते एसएलआर राइफलसहित गिरफ्तार गरेको प्रहरीले जनाएको छ  ।

गिरफ्तारमा परेका तामाङको सूचनाको आधारमा प्रहरीले सिलिचोङ गाउँपालिका होयाङ्ला मयङ्दस्थित ढुङ्गाको ओढारमा लुकाएको अवस्थामा एक राउण्ड गोली च्याम्बर लोड भएको एसएलआर राइफल बरामद गरिएको पनि प्रहरीले जनाएको छ ।

उक्त राइफलसँगै १० राउण्ड गोली लोड भएको म्यागजिन एउटा, एलएमजी राइफलमा लाग्ने म्यागजिन सहित २० राउण्ड गोली, झोलामा राखिएको एसएलआर राइफलको गोली ५४ थान र विष्फोटन गराउन प्रयोग गरिने रातो रङ्को ३४ फिट लामो डेडकर्ड पनि बरामद गरिएको जिल्लाप्रहरी कार्यालयका इन्स्पेक्टर रामेश्वर पण्डितले बताए ।


बाबुराम बास्तोला